佛都有火，回不去了的龔水故事？
「從一個普通觀眾的角度說感受」
#普通觀眾一個 #純粹是小粉絲的個人真實感受與心底話 #心中所想 #心中感受 #萬字感受文 #隨心而寫
由4月開始，龔水故事進入咗黑暗期，月尾仲俾see see tvb條偏頗短片燃點咗我心中團怒火🔥，炸咗安靜嘅我上水，膽粗粗寫咗篇八千幾字文，出Post抒發心中感受。隔咗兩個月，依段時間我對開心速遞龔水故事嘅感覺又如何呢？
當然，每個人嘅睇法、感覺、口味都唔同，以下純粹係我個人真實感受。雖然我唔擅長寫文、唔識寫劇評，人生閱歷唔多，睇嘢唔係特別通透，對於故事發展亦俾唔到啲咩實用嘅意見，但內心唔多唔少都會有感受想表達，所以決定好直接好casual blog style 形式打出嚟作為記錄。之不過，隔咗一段時間先寫翻之前幾集嘅感想，當時我睇完live嘅感受其實都唔太記得lu ～ (尤其係4、5月啲 What the 🙄️ 懶有劇情嘅劇情，我完全唔想記住，恨不得從來都冇出現過) 所以依一刻我諗到咩就打咩，非·常·隨·意！
註1：本人語文水平、文筆唔多好，可能有用詞不當、詞不達意，又中又英又口語又書面語唔consistent，表達得唔好嘅話，事先講聲唔好意思，嘻～
註2：以下內容帶點火藥味，若然你受不了的，可選擇離開 😌 ～
【過山車般的劇情發展】
上次寫嘅時候播到Ep. 859，劇組為左增加龔水May線嘅劇情張力、話題性、刺激性，別有用心製造誤會，營造藕斷絲蓮、唔清唔楚嘅三角關係。感覺上編劇無好好去了解過往龔水(尤其係龔生)嘅背景人設、鋪陳，就格硬加正劇式前度劇情落龔水線度，仲加個對劇情都冇作用嘅羅拔仔設定俾龔生，真係睇到反白眼🙄️，打曬冷陣🤢。作為一個一直追睇、鍾意龔水線嘅觀眾，見到龔水故事發展變成咁樣，真心好·無·奈 TnT ......
// Ep. 869 誰願放手 (龔水May線😲) | 2020.05.07 //
去到Ep. 869，龔水May線終於嚟個「了斷」。依一集以水嘅角度出發，透過龔爸對水嘅「奚落」、上集龔May二人跳舞、龔May天台單獨見面等，展現水內心嘅不安恐懼。幸好有大家姐嘅開導，點醒翻水水唔係所有嘢都可以忍、可以退 ，「幸福係要自己爭取嫁」！所以，水水一上到天台見到龔May疑似手掂手就爆seed，我非常理解，換轉係我同樣都會爆！反而，龔生話翻媽呢空轉頭「癲夠未呀」，依句非·常·哽·耳。龔生呀龔生，你係知道may嘅出現會令媽呢空不安，但你仍然一次又一次工作以外瞞著媽呢空單獨見May，事前又冇同媽呢空提過..... 其實唔理係咩原因，想多謝前度May又好報恩都好，唔通咁樣「你暪我暪」真係無問題？信心、安全感唔係單憑之前一兩句甜言蜜語就能夠俾到對方，而係靠實際嘅行動同表示。可笑嘅係明明係龔生行為上令媽呢空產生誤會，但龔生竟然反問媽呢空點解對男朋友咁冇信心？！龔生你知道自己在做什麼嗎？ 係天台發洩嘅龔生好似突然鬼上身咁，顯得好陌生...... 可......能......有...可...能...編劇想表達無人完美......掛...... 所以龔生都會有突然跳掣EQ下降嘅時候，佢俾女朋友「誤解」，情緒難免會稍為失控，結果衝口而出講咗啲較難聽嘅說話，「正常」不過啦，哈。還好，依集嘅媽呢空有翻善良大方嘅特質，龔生事後解釋「補獲」，媽呢空諒解就冇再嘈落去，仲義字當頭一鼓作氣搵May道歉，關心佢有咩心理陰影添！義·氣·水再現啦！
之後水無意中發現當年龔may不歡而散係因為一個「美麗」嘅誤會，決意俾龔may知道當年二人錯過對方嘅真相，自我犠牲，放手讓愛，寧願自己傷心痛哭都要成全他人。媽呢空如此大方大愛，我諗世上真係冇幾多女人做得到！睇到依到，我有一個謎思：究竟媽呢空對自己、對龔水戀幾無信心，先至覺得龔生知道真相後會選擇離開佢同翻個前度一齊？其實媽呢空知唔知到，有冇了解過龔生真正愛上佢、迷戀佢嘅原因呢？似乎劇組冇點樣係依方面着墨呈現俾觀眾，只係大家有上帝視角，知道龔為何那麼心愛着水。個人認為，真正的愛情不在乎在一起有多久，只在乎能否分擔喜樂憂患，克服難關，互相扶持從經歷中成長，成就更好的你和妳。7年嘅初戀情，美麗嘅誤會又·如·何？戀愛沒有方程式，錯過了就是錯過了，過去了就是過去了，命中注定不是你，這·是·天·意。其實呢，我就感受唔到所呈現嘅龔May 7 年初戀情，有幾美好有幾動容，令到May過左咁多年仍然心念念放唔低 (或者我理解唔到初戀情意結係咩一回事)，所以我一啲都唔覺得惋惜，哈。當我聽到媽呢空同大家姐講「原來男主角(龔燁)應該同翻初戀女朋友(May)一齊，初戀女朋友先至係女主角，佢哋可以重新開始」，我個樣即刻「馬明樹熊.JPG」：What？... 唔·__·係·呀·嘛......
（Btw 🦀🦀嘅內心不安、幾場喊戲好有感染力，情緒自然流露，睇live嘅時候真係觸動到我嘅淚腺啊😢！）
「犧牲小我，完成大我。」
媽呢空心胸廣闊、為人設想嘅行為深深打動到龔，令龔清醒回來，反思no.1嘅問題，決定用行動去證明「妳，媽呢空，原來不知不覺間成為了我，龔，心目中嘅no. 1。妳係我現在唯一心愛嘅女人，我真係唔應該再令妳受到委屈！」龔霸氣地拖著媽呢空去到老人院，勇敢地大聲同阿爸講清楚邊個先係龔家好新抱，的確好Man。睇到依到，我有點安慰，安慰嘅係依條令人心煩嘅龔水May線「終於」告·一·段·落 (2020.06.27 Comment: 頂，假象嚟嘅🤮)。結尾嘅反cup用易拉架、櫃桶龔水二人合照去迫龔爸好好記住Mary，又幾特別，確實估你唔到。
不過，一個甜反cup唔會滿足到我，始終依三集嘅龔水May線 (仲有之前為咗鋪龔水May三角關係嘅4月1號愚人節龔水求婚鬧劇、黑洞「驚」典事件) 破壞咗我對龔水故事嘅觀感，破壞咗就係破壞咗，我心裏面點都有刺，哭。我向來對龔水都有信心，唔信劇組真係「夠膽」拆龔水。但4、5月嘅龔水劇情真心簡直係惡夢一般，我心痛嘅唔係見到龔水鬧交冷戰，而係劇組為咗所謂嘅戲劇效果，亂加嘢落龔水線度。有啲情節為寫而寫，為誤會而誤會，為嗌交而嗌交，為冷戰而冷戰，唉 ...... 無錯，依段時期嘅劇情充滿高低起伏，坐過山車咁樣幾咁刺激，有齊起承轉合戲劇感十足，睇到大家「㷫·熻·熻」添！無之前一個又一個老土誤會同虐心戲，哪來結尾反cup龔生超Man霸氣行動嘅「爆」感呢，哈！ 如果只係單集咁睇/ 純睇龔水May線，咁dramatic嘅8:30, 9:30正劇式劇情，睇電視撈飯嘅觀眾會覺得幾過癮嫁。但，咳咳，麻煩劇組搞清楚，依套係拍咗超過3年嘅8:00處境[喜]劇，龔水故事發展咗2年半又有咁多觀眾鍾意一直真心支持，編劇係咪應該按翻龔水線一直以嚟600幾集嘅鋪陳去度橋，好好咁寫龔水May劇情呢？明顯地劇組無認真考慮情節嘅連貫性、合理性，純粹覺得有新角色加入，劇情有高高低低、有張力就有新鮮感、有戲睇、有正劇feel，咁樣咪吸引觀眾去睇lol。Well，sorry，我心目中嘅龔水故事係貼地、獨特、輕鬆、有趣、寫實，完全唔·係·老·老·土·土 ......
講真，曾經我同唔少網民一樣，好好奇阿May到底係一個點樣嘅人，覺得May嘅出現可以好好咁補充龔生年輕時嘅腹黑背景。好可惜，劇組為咗May「華麗」登場，令到龔水故事「反轉、反轉、再反轉」...... 7年初戀情究竟係咩定位、咩一回事？「改寫」龔生嘅過去令忠實粉絲睇到黑人問號、一頭霧水，不特止，仲要加May嘅專稱“Robert”俾龔生...... Robert依個名已經係二十幾年前，喂分咗手n年架啦，仲係Robert Robert咁叫，懶熟？頂，May每次叫Robert，我都頂唔順爆粗😡。見點呀，Ro咩bert咩呀，又冇特別意義又唔浪漫又唔搞笑，土味十足，一個字「好7️⃣」。明明 May只係龔生生命中其中一個過客，本來「客串」一下啫，結果出到嚟嘅劇情反而掉翻轉要龔水圍著阿May轉，搞亂曬之前龔水線精彩嘅鋪排，WoW 劇組你係得嘅，真係多·謝·曬！龔水故事搞成咁，好失望、好失望、好失望......想龔水關係有暗湧，令到水水有危機感，最後龔水齊齊戰勝愛情考驗，唔係唔得，但絕對唔係用依啲正劇老是常出現嘅老土誤會式套路囉，okay？
龔水May線呢，我就唔收貨啦。龔May所謂嘅過去同心結其實只係好表面咁講，有啲事淨用幾句對白帶過就算(e.g. 媽呢空幫May「消除」腳傷心理陰影) ，有啲誤會情節非常牽強，有啲位嘅鋪排銜接總係奇奇怪怪，重心細位錯曬，刻劃又唔深刻，龔生作為兩段情嘅男主角，佢嘅solo內心戲又少得可憐，三人行故事內容鬆散太多好鬼無謂嘅枝節，欠缺深度同韻味，節奏流暢度亦唔見有好好咁掌握，非常之可惜......
若然劇組將劇情集中翻係 ：
(1) May如何令龔走上腹黑之路，成為一個唔會相信人嘅賤精
(2) 龔May當年分開嘅心結
(3) 媽呢空寧願自我犠牲
(4) 龔生對於兩段情嘅內心感受：
- 龔同May早已緣分已盡，無論點所有野已經係過去式
- 同媽呢空經歷咗咁多嘢，雙下巴天使先係龔希望一齊走餘下人生路嘅女人。媽呢空嘅犠牲令龔好好反思no.1問題，引發龔同阿爸講清楚
(5) 龔&水因對方嘅行動而感動，坐低坦誠互談心底話，好好了解，感情昇華
(6) May 解開咗當年同龔分開嘅心結之後唔再執着，真真正正放低初戀情，move on ，並期待自己真命天子 Mr. Right 出現
咁樣我對條龔水May線嘅觀感會好少少。個啲咩「誤會May曾有BB」、「May曾救龔爸，龔要報恩」、「May意外戴上龔買俾Mary嘅求婚戒指」、「龔May唔避忌單對單餐廳食飯 + 無lala跳舞，話龔要了解May有咩心裡陰影但又唔覺意俾Mary見到誤會」、「龔May約係天台還戒指但又唔知點解冇避忌兩隻手要哄咁埋，然後又咁岩俾Mary見到」等等等等眾多無謂老土誤會情節，🤢，不了不了。
劇本咁樣已經冇眼睇嫁啦，集數安排更加令人無奈😑！龔水May線 Ep. 848, 859, 869，3集，每集與每集之間隔成10集左右，劇組應該想令到大大家心掛掛，好想知龔水May嘅關係發展啊啊啊啊啊。Errrr......🙄️ 依個安排懶掉癮咁，拖泥帶水就真😤。作爲一個超唔鍾意睇正劇誤會式三角關係嘅觀眾，龔水May線嘅集數安排真係勁·之·拖，節奏勁慢，毫無吸引力。我記得以前開心速遞會有（上）、（下）集嘅安排，緊湊啲連貫啲，等觀眾容易follow接著嘅劇情發展。但唔知點解依家無論咩cp線都好，好少有依個安排。Any肥，當時嘅我只係好想好想好想誤會又誤會令我心煩嘅龔水May線快·快·脆·脆 close file，move on，完。End up 龔水May線搞咗差唔多一個月先[偽]完到，真係......😪
另一樣嘢，過場問題。明明龔水線由Ep. 833開始 (求婚鬧劇失敗，龔水陷入冷戰) 啟動咗「追睇」模式 (i.e.故事內容係連續嘅，唔係集集清)，主線與主線之間係都要隔一排拖長嚟講，算。期間角色(水水) 出現係其他集數時候嘅處境、心情，總有啲位好鬼怪。其中一個怪位出現係Ep. 833 鐵re搵班姊妹係道德菜館傾搞婚禮嘅事，當時龔水經歷完訂婚失敗嘅笑話，水水同龔生感情上出現咗問題，但水水仲肯出席飯局而Rebecca唔理咁多係度chur 水水幫手已經夠「好笑」(不過以Rebecca嘅性格，的確唔會care姊妹感受😵)，Helen同Rebecca 仲話水水「失戀」......😳 What? 失戀？龔水幾時分咗手觀眾完全唔知嫁？最多都係冷戰未搵翻對方啫，失咩戀咩呀？水水又冇即時糾正Rebecca, Helen 😥...... 係從來無交代龔水分手嘅情況下，突然話水水「失戀」，真係出奇過出奇蛋🤗。劇組專登強化龔水「分開咗」嘅效果，目的就係要挑起觀眾嘅情緒，等之後前度May加入龔水線嘅時候無咁突兀？哈，咁就要問問編劇編審們啦！第二，明明Ep. 859 ending，水見到龔May無lala係度跳舞，內心係非常不安嘅。但係Ep. 860 - 868期間，水水好似冇咗一回事咁，繼續開開心心咁生活。要去到Ep. 869 主線啦，水水嘅不安感先「突然」出現翻🙂。而龔生呢，人間蒸發咗，連接龍職場群戲都搵唔到佢嘅蹤影，消失得無影無蹤😥，成個4、5月龔生要到主線先蒲翻頭......😓 Em...若然角色係過場嘅時候係連唔到戲嘅話，咁倒不如龔水May線個幾集啦啦聲一次過播曬佢啦，拖成個月做·咩·呢😑？
(以上99.5% 內容係 before 2020.06.26 寫落，未睇Ep. 919 live)
————————————
(以下內容係100%睇完Ep. 919 live之後寫嘅，所以去到某啲位火藥味會重少少😌)
過咗Ep. 869，龔水May嘅心結解咗，而龔生又係阿爸面前承認咗媽呢空係唯一會娶嘅女仔，龔生當然要執行翻佢嘅求婚計劃啦，完成阿爸依家最大嘅心願，認認真真娶媽呢空翻嚟成家立室，等阿爸安心。所以接著嘅主線圍繞翻求婚話題，觀眾都好期待。諗起今年三月白色情人節(一個對龔水非常重要、好有紀念價值嘅節日)，劇組冇安排拍拖一周年紀念集數俾龔水，粉絲們期望落空，大家失望，好正常，因為無諗過一個咁重要嘅龔水拍拖紀念日，劇組竟然漠視😟，一定係粉絲自己諗多咗啦。冇拍拖周年紀念集數，大家忍，唯有寄望龔水能快一點有求婚戲結婚戲，開展人生新一篇章
// Ep. 891 求婚的秘密 (龔水大小姐線😐) | 2020.05.29 💍 龔水訂婚了！ //
求婚，作為人生其中一個重要嘅里程碑，粉絲們當然有憧憬，希望可以好似Ep. 534龔水示愛戲一樣，有鋪排，既震撼浪漫又感動。可惜，Ep. 891 所呈現嘅求婚戲比大家幻想嘅、期望嘅有好大落差，大家失望，好正常。當初我幻想嘅龔水求婚戲，當然係發生喺龔水定情之地 - 舊立法會前嘅「龔水橋」啦，同2019年 Ep. 534「白色情人節」Ending 表白戲做對應，係屬於龔水兩個人嘅時光 (哈哈，就好似下面我整嘅畫作咁樣) ～ 龔生嘅求婚誓詞，包含相識、鬥氣、解心結、暗戀、拆彈、定情、拍拖等等嘅一點一滴，有開心有唔開心，感謝媽呢空嘅出現令佢嘅生命添上色彩，再加上一些龔式情話💬。龔生一路講，回憶片段一幕一幕呈現出嚟，勾翻起觀眾 & 龔水粉絲所有美好回憶。「路係難走，一路以嚟確係唔容易，但無論幾難都好，我都想同妳一齊走落去，一齊經歷，一齊成長。媽呢空，嫁俾我呀！」媽呢空回應自己點解會真正愛上龔，感謝龔一直默默地保護佢，「龔燁，三個字，我願意！」。動人嘅對話，加上中環靚景，非常浪漫、感人。
「嗯，FF，總是美好的。」
「幻想與現實，往往都有出入。」
劇中嘅求婚計劃不似預期，冇龔生(同埋觀眾) 預期嘅浪漫式求婚，但就有熊家人嘅見證、祝福，都係一件開心快樂嘅事。龔水戀， 向來都係與別不同，就係經常有你意想不到嘅時刻。最後嘅求婚戲，係熊家突然跪地即興進行，雖然落差好大，有一點點失望，但我係接受到嘅。見到熊家人一個一個嘅反應，幾有趣呀 (esp. 大家姐、安仔、fish食著花生咁睇🤣)。龔生求婚成功，熊家人齊心歡呼。「家溫馨的感覺，就是這樣。」
(睇完Ep. 891 live, 🦀🦀 & Stanley係售後龔水福利post 提到「家人就是最佳觀眾」、「在家裏和在家人的見證下，是最好的時間和地方」，令我對「家」嘅感覺更加強烈呢！)
觀眾期待已久的求婚戲，只有短短1分半鐘。沒有華麗的鋪排，沒有肉麻的對白，看下去平淡無奇，卻滲透着濃濃的甜蜜感。這，大概是因為有🦀🦀 & Stanley自然真摯的演繹吧！由龔生突然情不自禁跪地告白，突如其來，龔心情非常緊張，腦海一片空白，之前預備了的求婚誓詞，已經忘記得一清二楚；到媽呢空眼有涙光回應，然後說聲我願意；二人的微表情、語氣、節奏、感覺，剛剛好。我自己特別鍾意龔生「得咗啦‼️」，然後好開心幫水戴上求婚介指，龔水對視互擁，頭貼頭形成一個心型，溫溫馨馨影Polaroid；幸福的畫面、龔水由心而發燦爛的笑容，非常暖心。我會心微笑，完全感受到龔水的喜悅。
撇開個劇本，演員真係演到真誠窩心嘅感覺，細緻嘅演繹，感動到觀眾，令到平淡、短短嘅求婚戲，加咗好多好多分。
「遇上你(妳)，太感恩，不遲亦不早。」
龔自從再遇上媽呢空，媽呢空成為他專屬的雙下巴天使，龔開心了很多很多，笑容燦爛了很多很多。
水的K先生，Kung Yip，就是金師傅所說的真命天子。
龔水，命中注定的一對。雖然一開始彼此的距離有點遠，但並沒有斷。幸好有雙下巴天使的眷顧，有命運之神向龔水微笑，讓龔水沒有錯過彼此。
從歡喜冤家到熱戀情侶，觀眾陪伴龔水一起渡過每一個難關、每一個考驗，一起從經歷中學習，一起一步步地成長；到現在看見龔水踏入人生另一個新階段，滿滿的欣慰，滿滿的感動。
願龔水繼續緊緊地手牽手互相扶持👫🏻，幸福甜蜜地走餘下的人生路🛣。
不過，接受到還接受到，我對於依集嘅安排唔滿意，亦係事實。我好記得當晚我睇完live，我第一個反應係，咦，點解依集叫「求婚的秘密」嘅？我問號問號咗一陣，睇到其他網民嘅網上討論，先醒起係喎，ending水想同姐妹分享求婚片段嘅時候龔阻止水，話依個係佢地兩個人嘅秘密lol😅。講真，做完上半場，我心諗，「喂，點解好似貨不對辦咁嘅？咩事呢？可唔可以快啲入正題呀😓？」。明明依集個標題寫到明係關於求婚，點解可以有一半嘅戲係同求婚冇關嘅？明顯地，依集主次不分、唔太貼題，完全都唔係主力focus係龔水嘅求婚故事。水水突然間超強嘅事業心，之前嘅集數亦都好似冇點鋪過，最多得Ep. 825 「失落了的事業心」一集。但我覺得Ep. 825只係兜翻Ep. 669 「只想你包庇」，話俾觀眾知「嗱，水水唔係淨係掛住拍拖唔理工作嫁，你哋要睇到努力工作OT、會負責任嘅水嘛，寫翻水水有事業心先。」Ep. 825 嘅水水係有翻工作幹勁，但未至於要放棄其他嘢，只專注事業吧？！但大小姐一霸氣回歸接龍，只係半集，水水就突然變咗「女強人」，連結婚都可以放埋一邊......水水之前唔係恨嫁，仲好期待龔生求婚嫁咩？？？最好笑嘅係上半集所講嘅「職場女強人」、幫大小姐做大project，原來只係做大小姐隻「跟尾狗」，係大小姐後面跟著收數咋，完全見唔到水水有咩發揮機會......劇組要拖戲，寫水水要「專心事業」唔結婚住，我算，但都唔洗擺埋係求婚嗰集一齊講呀嘛？我諗唔明，點解唔可以分開2集？先有一集講水水真係忙於幫大小姐處理大project、趕deadline做propsal、見客，見客成功傾掂個大project，俾客讚做得好，呈現到水水真係好幫得手，係大小姐嘅得力助手；然之後有一集認認真真focus講龔生求婚。仲有，點解事業同結婚唔可以並存呢？最多咪唔生仔組織家庭著......我到依一刻都諗唔明......
[題外話：近年職場龔好似冇乜點出現，水水嘅事業心好似仲強過龔生呢😶。龔生除咗係暖男好男友，亦都係事業型男人嚟㗎。作為絕頂聰明一個頂十個嘅亞太區市場部總監，好想見到拆彈專家幫接龍解決一個又一個關公災難，想念聰明嘅拆彈龔......既然編劇唔俾龔水結婚住，可以寫吓真正嘅職場接龍戲(就好似Ep. 448 選戰，唔係初戀cafe講八卦嘢嗰啲)，等職場孖寶Marketing精英龔水上場，拍住上拆彈/ KO 大 project！龔水職場上嘅火花，諗吓都興奮，諗吓都過癮！]
由4月Ep.848 龔水may線開始，到5月 Ep.891 龔水求婚，龔水主線都係處於「三人行」嘅狀態😓......龔水無一週年拍拖紀念集數都算，估唔到連求婚集數，一個重要嘅里程碑，都要俾其他角色騎劫佔咗大部分airtime，而唔係真真正正屬於龔水二人嘅主線，未免太可憐吧？！Ep. 891 所謂嘅求婚戲，對於我嚟講係太倉猝、唔夠喉。求婚，作為男人人生其中一個big challenge，「打大佬」咁樣，要成功過關俾女友驚喜、難忘嘅回憶，當然要好好準備啦！我同好多網民一樣，好想睇多少少龔生預備求婚驚喜嘅過程，買花、買戒指、搵求婚地方等等等等，想睇吓有冇蝦碌搞笑嘢發生🤪，可惜編劇無點樣係依方面着墨，或者係因為airtime唔夠......可惜可惜。其實，Ep. 891 龔為求婚而準備嘅小驚喜 — 龔趁水瞓著嘅時候偷偷地戴上求婚介指Selfie ，依個細節位幾特別，我幾鍾意。睇到龔生同媽呢空分享selfie相嘅時候，我都感到驚喜呢～ 龔生日常情趣的確幾鬼馬有趣，真係估佢唔到，一·啲·都·唔·老·土！認同好多網民所講：若果劇組有將依個小驚喜嘅準備過程拍出嚟呈現俾觀眾，個驚喜效果會更加好，或者係因為airtime唔夠......可惜可惜。仲有，若果龔生係熊家求婚成功之後，加翻一段tree gun 同二妹、龔嘅親情對話 (雖然根叔偏心三妹、大妹多啲，但嫁女喎，心底裏唔多唔少都會有說話想講嘅)，依場求婚戲應該會更加動容，或者係因為airtime唔夠......可惜可惜。仲有仲有，龔爸呢？究竟龔爸知唔知阿仔已求婚成功，同Mary訂咗婚嫁？我都好想知龔爸嘅反應...... 「仔，大個仔啦，訓練好個膊頭，記得要好好守住頭家呀！」......或者係因為airtime唔夠......可惜可惜。
究竟編劇係唔係從來都冇諗過要好好咁寫、好好咁鋪龔水求婚戲，用「塞住粉絲把口」嘅心態寫 Ep. 891 求婚集數？哈，咁就要問問編劇編審們啦！
兩年，話快唔快，話慢唔慢。其實觀眾想睇龔水籌備婚禮、結婚當日嘅趣事&婚後日常，唔知幾時會睇到呢？唔知幾時會有龔水步入教堂嘅婚禮戲呢？希望希望，唔洗等好耐💫......
求婚戲過後嘅Ep. 904龔水副線 & Ep. 907 龔水主線，的確唔錯唔錯，仲有正正常常嘅龔水過場。每次聽到龔生(好自豪咁)對住媽呢空講「未婚妻」、「My Fiancée」，我都會瞇瞇嘴笑，hehe，甜在心頭 😊。水水呀水水，妳幾時改口叫龔生「未婚夫」、「Fiancé」呢？
簡簡單單嘅龔水日常，就係觀眾想睇嘅故事。
// Ep. 904 錯的替身 (水主線、龔水副線😜) | 2020.06.11 //
依集輕鬆明快，有笑位，有驚喜，睇得開心。龔生，一個一等一聰明嘅好男友，略施小計就幫到媽呢空脫離苦難。無錯，最醒都係你啦，龔生，哈哈 😏！結尾小反cup，龔生真·食蕉連皮 2.0，意想不到，好有趣，好好笑。每loop 一次龔生食蕉連皮.gif，就笑一次！龔爸曾講過：「兩個人係埋一齊，互相整估都係一種情趣。」(Ep. 833) 食蕉連皮，龔水獨有，Fiancée & Fiancé 鬥氣耍花槍，我們識咩呀，哈哈～ 就係鍾意睇佢哋耍花槍，好正啊喂😝！依集真係有以前龔水故事嘅味道，睇到有天真水、硬頸水、 鬥氣水；暖男龔、醒目龔 、自信龔，自己讚自己，哈哈，有少少以前「賤精」嘅感覺呢！睇吓依集編劇係邊個先～ 喔，原來係寫 Ep. 215 賤精來了 (龔生第一集出場) 嘅編劇，唔怪知得咁有以前嘅感覺啦～
不過，經過歲月嘅洗禮，龔生多咗一份成熟感，賤精先生唔再「賤」lu，係個有頭腦、有膊頭、有擔帶嘅暖男龔！
//Ep. 907 老土萬歲！(龔水主線😊) | 2020.06.14 //
老實講，見到標題真係幾驚依集龔水主線係某編劇嘅作品。當日live 播 opening 嘅時候個心噗噗、噗噗跳，見到唔係佢寫，呼，真係鬆咗一大口氣，然後滿心期待。睇完依集，內心感動，最感動嘅係依集終於係真真正正屬於龔水二人嘅主線，唔再係「三人行」嘅狀態，足足兩個月，有點久違嘅感覺，感動。
先講下我鍾意嘅情節 (10點)：
(1) 一開場就見到接龍市場部，好驚喜，好似好耐冇見啦！仲有直腸直肚嘅新丁「阿千」、「阿熹」加入，龔生以阿頭身分係pantry同兩位後生仔傾下計，大方交流「浪漫」心得，幾有新鮮感。幸好現階段嘅龔係已被感化嘅仁慈龔，如果係以前，兩位誠實敢言嘅新丁下一秒已經俾龔暗地裏叮走咗，一早「死」咗十世啦!!
(希望之後有機會見到龔生同兩位新丁係工作上嘅交流，職場新丁招招積積，唔識人情世故，唔知會唔會係頂心杉呢，哈哈？想睇下職場工作戲，睇下同新生代合作會有咩火花💥！職場就好似社會縮影，可能我係一個普通打工薯仔啦，所以幾鍾意睇職場群戲～）
(2) 係公司玩緣分遊戲、天台二人世界食lunch，加埋喜感十足嘅接龍花生三友Andy, Peter, Ivan幫手助龔、增加遊戲樂趣，十萬個趣🤪。Andy扮「龔」，正喎😏 ～ Peter, Ivan 扮侍應，ahahahahah 就算佢哋冇對白要講，行出嚟齋做動作我已經好想笑🤣🤣🤣，佢哋將兩個圓咕碌餐蓋放係胸口...落少少係咩事🤣🤣🤣，見點呀兩位😆！(唔知係咪我笑點低，我一路打依段，一路係度傻笑😂) 依場天台戲嘅重點，當然係參考港產片經典對白去營造浪漫感。龔生吞一吞口水，然後真誠地講出三個字「我養你」，的確好鬼冧！「收到啦，傻仔 ～」媽呢空灑脫咁回應龔，內心一定係冧滋滋😚，一定係！
(3) 龔水四手聯彈，的確浪漫。本身好美好嘅，但龔生一聽到媽呢空話佢似一個人 -「姐卵」，龔頓時失落，想一個人靜靜，媽呢空唔知自己係咪講錯咗啲咩，一臉茫然，依部分兩位演員嘅情緒演繹好到位。好多人對著自己熟悉嘅人，可以係親人、好朋友、情人，舒服自在嘛，所以說話會比較真、直接，唔會點樣特別修飾/諗過度過先講。有時候，一句不經意嘅說話，就可能會trigger到對方，令對方唔開心。依場鋼琴戲嘅龔水，正是如此吧。
(4) 去到餐廳約會，媽呢空變可愛水，好似小朋友咁樣，勁興奮期待每月一次驚喜嘅來臨。搵呀搵，咦，冇嘅？左望右望前望後望，冇嘅？又跟著龔生探頭落檯底，哎呀，撞到頭添😣！遴迍水，傻氣滿滿，好得意啊😝！ 但係...龔生心情就唔多好...處於唔開心、無癮嘅狀態...龔臉上嘅笑容收起咗，就算見到活潑可愛、傻間間嘅媽呢空，仍然冷靜淡漠。開心水VS冷酷龔，有趣嘅對比。因爲龔在意俾人話龔式浪漫係老土，唔想再被”hurt”，所以寧願話乜都冇準備過，「不如買包包算啦媽呢空，起碼妳會鍾意嘛。」媽呢空期待落空，心想：我唔係要包包呀😟，我要驚喜啊！！失望水掃興扁嘴。不過媽呢空今次係乖巧水，就算龔唔知做乜事唔守承諾，媽呢空都無亂發脾氣，乖 😉。
(5) 聰明龔，向來自信滿滿。職場上，無龔解決唔到嘅事；但愛情上，龔總係跌跌砰砰。龔嘗試過、努力過、想去證明，但仍然多次聽到唔同人話「龔燁式浪漫」老土，仲要係去到怪魔級添，想唔認都唔得啦......突然領略到咩咩&職場新丁所講：「我老闆做嘢嘅taste從來都無問題，但係一講到對浪漫嘅定義呢，真係就好有個人色彩lol～ (點解老細你做嘢咁貼地，講到溝女就....啲招式好老土。。。) 」唉，做咩都無人欣賞，連媽呢空都唔欣賞，唔通我真係唔識浪漫，係個戀愛「白痴」😢？好啦，都係乜都唔做就最好，費時再俾人話自己自作多情 。心淡，好灰啊 😞......自信心急降嘅失落龔，同Ep. 904 (對上一集副線) 嘅自信龔有一個好大嘅反差呢，哈哈。
(6) 龔生係孝順仔，好照顧龔爸，個個都知。訂婚後嘅龔生，愛屋及烏，熊家人即係我屋企人，每一位都重要，要好好守護我妳彼此嘅「家」。所以有事發生嘅時候，龔勇敢走前保護每個佢重視嘅人，的確係個顧家嘅好老龔👍🏻。(P.S. 安仔走先快閃個跑姿好好笑呢🤣，死仔包呀！)
(7) 霸氣水，型爆登場的一刻。媽呢空突然踩住單車出現拯救龔，「你地想對我男朋友做咩呀 (係「未婚夫」呀水水😆)。」殺車回頭，然後瀟灑地說一聲「上車」，一個字：「好型」！有點意想不到呢，有驚喜喔！龔立即跳上單車，”Go, go, go” ，媽呢空就咬緊牙關，開行Turbo高速向前衝。而龔呢，嘻嘻，有點戰戰兢兢，做水背後嘅男人，唔怕路人嘅眼光，放心用力抱緊媽呢空。
🔗 ”Together, we thrive” 🖇
(8) 霸氣過後，溝通的一刻。龔行一步，水在背後跟隨龔行一步，氹氹轉傾談。雙方坦誠的對話，心靈上的交流，是另一種浪漫。摩天輪🎡作背景，觸動我心的一幕，這個畫面，一個字：「好靚」！
人偶然鬧情緒、炆憎，正常不過。龔之前話諗通咗啲嘢，但其實烏雲仍然係佢頭頂徘徊，仲係有唔開心呢......一個人，的確好容易諗埋一邊，撇唔開憂愁嘅想法。幸好，每當龔有唔開心、諗唔通嘅時候，媽呢空總會係佢身邊陪伴，主動開口了解、安慰、開導，一步步解開對方執著、諗唔通嘅事情。
人與人之間相處，有想法不一，不要緊，重點在於溝通，給予機會互相坦誠地說出內心感受，交流心得、看法，免去各自心中的誤會，好好了解，珍惜對方。
根叔曾對二妹講過，「其實你兩個都各自有自己嘅諗法同習慣。有咩事上嚟，你哋咪商量下、遷就下，咁樣就可以喇，唔洗成日攞嚟同人比㗎。」(Ep. 745「愛我請計劃」)
要維持一段健康長久的關係，雙向的溝通真的很重要很重要。你和妳，停一停，說一說，聽一聽；換個角度，調整心態，再想一想💭。每一次的溝通，都是感情昇華的契機。坦誠相見，是婚姻之道。
💧💬🏹：「關人地咩事呢，我哋自己開心咪得囉，唔使理人點睇嫁。」
無錯，拍拖係兩個人嘅事，每對情侶都各有一套相處方式，局外人又知幾多呢？
💧💬🏹：「你平時氹我、俾驚喜我嘅時候，我都好feel到你嘅誠意嫁！」
做好自己，凡事隨心，用心對待；真誠，是能夠打動人的。
過份在意其他人對自己的評價，形成無形的壓力，只會令自己不開心，愛你的人擔心，何苦呢？
毋須去比較，毋須過份去在意，與你(妳)一起活得舒適自在，才是最緊要。
無論你(妳)喜歡與否，
一句感謝，心滿意足，是心靈上的滿足。
心中有你(妳)，在乎你(妳)，已經足夠。
天使水，確實是龔的心靈導師。
這場溝通戲，讓我想起龔水在相遇戀愛路上，水多次開導龔 ，讓龔解開心結，走出陰霾。無論以前或現在，龔在雙下巴天使面前，最真、最舒服、最自在。
/Ep. 266 & 267 「心戰」、「報仇記」/
荒地密室朱古力金幣事件，讓龔確確實實感受到原來這個世上是有好人的存在。因義氣水在臨死邊緣的拯救、一次又一次的幫忙，令龔選擇相信她。龔水在海傍對話，龔大方地吐出年少時家道中落、被人拋棄的慘痛經歷。這，應該是龔第一次讓其他人知道自己鮮為人知的一面。
/Ep. 503 & 504 「龔燁復仇記」/
龔燁終於找到傑叔，雖然過了二十多年，但心中團怒火從未熄滅，對傑叔報仇與否，忐忑不安。龔迷惘，水在背後靜默陪伴。龔水坐在籃球場觀眾席對話，龔分享兒時與傑叔的美好回憶，水說傑叔其實也曾是個照顧龔的好人，「冤冤相報何時了呢？」。龔可以憎傑叔，但同時也可選擇放下報仇之心，真正放下，別讓自己一直活在仇恨苦難裏，因這些壞人而執著，很不值。一段簡單的對話，一個對視，一個微笑，讓龔決定放下埋藏在心裏二十多年的心結。龔放過傑叔，但傑叔再次欺騙龔，龔心裏極不好受，報仇之心再次燃起。向來冷靜的龔，因心中充滿着仇恨，頓時變得衝動起來。幸好幸好水及時制止及勸告，在龔身邊不斷提醒他要顧及阿爸的感受，好讓龔爸都可以放下二十年的心結。因有水的同行，龔冷靜下來，想清楚要怎樣去處理。龔跟傑叔說，不用還債了，只要傑叔配合做一場戲，讓龔爸知道自己無信錯傑叔，令龔爸安心、開心的話，龔與傑叔之間的仇，什麼都可以放下。在這一場龔的人生考驗裏，水的陪伴與開解真的是十分重要。沒有水，恐怕龔沒法走出困局，繼續壓抑地活在仇恨苦難裏。是水「拯救」了龔，讓龔真真正正放下愁緒，展露笑容。
/Ep. 534 「白色情人節」/
縱然解決了傑叔這個難關，但龔還須拼搏，在龔爸還有意識的時候，買回九肚山住所及工廠，讓阿爸安心。之前因傑叔的事一次又一次對水爽約，傷了水的心，龔燁不能將水放在No. 1 這個問題，令龔感到困惑。龔深愛着水，但不知如何面對，示愛卻步。水從龔爸得知龔對自己的愛意，決定找龔講清楚。龔水在舊立法會面前對話，水拿着餅乾問龔在餅乾寫上”Mary, I Love You”，是否喜歡她？龔沒有立即承認。水接著說一起經歷了這麼多事，對龔有感覺，可以給龔一個機會。龔一臉茫然，大方說出No. 1的問題怕會傷害水。水回應：「同樣地，我亦不能放你在No. 1，你不介意的話，我亦不會介意。」龔放下心頭大石，勇敢地以「世紀之吻」回應水。龔嘆一口氣，「三個字，我願意」，就這樣龔與水在一起了。若果當初沒有水的主動，讓龔放下心中No. 1 這個問題，不知要等到何年何月何日，龔水才能一起......
善良水，總讓龔放鬆心情，安心地展現他軟弱的一面。
水是龔的樹窿，讓他打開心扉，盡訴心中事，毫無保留地顯露內裏抑壓的情緒。
水逐漸進入龔的內心世界，給他力量，為他解憂，共伴前行。
“When I think of you
I live out centuries
The sunshine and the lights
Fade to memories
I love you , I love you .
I used to be so proud
And now my heart is open wide.
I know
You saw my darkest side
And nothing's gonna change my mind
I can't stop loving you
I will promise you
Another dream for us
I need someone like you
To take away my loneliness
I love you, I love you
I used to be so pride
And now my heart is open wide.
I know
You saw my darkness side
Nothing's gonna change my mind
I can't stop loving you
I love you”
Lyrics of Faded Memories（龔水單車戲插曲)
(Source: https://www.apmmusic.com/albums/KOS-0192)
能找到一個真正關心你(妳)的、了解你(妳)的人，成為指路明燈，互相分擔憂喜，共伴走出黑暗，是幸運。
嗯，抱一抱，無事啦。
龔生，明白了。真的想通了，放下了；頭頂烏雲散去了，不再迷霧了；內心舒服了，笑容重現了。
雖然媽呢空妳「偷」我橋，又嚇親我😖，但依個驚喜，值得值得。
多謝妳，媽呢空😊！
(9) 溝通過後，浪漫的一刻。定情之地，舊地重遊，踏踏單車，看看風景；抱緊我，依偎我，笑一笑，甜甜蜜，共度屬於我妳二人的溫馨時光😇。好～浪～漫～呀～ (羡慕羡慕🤩，好鍾意龔水自然真摯嘅笑容，甜甜的，暖暖的😊)
每月一度的龔水驚喜，2020.06，不是輪流你/妳給驚喜，是龔與水共同的驚喜。
#龔水在一起一年零三個月快樂🌼
(10) 老土又如何？我受啊，要老土就一齊啦！最緊要有人同我一齊放閃，閃盲你班人先，嘻嘻 😎～ (💍 鑽石戒指係重點🤩!! 不過當晚我睇到依幕有少少打冷震🤣，係有少少老尷但好閃啊喂，尤其係隻戒指。龔水式放閃，隨時隨地，無人能及，正！要長期戴黑超先得🕶)
好喇，講講下差唔多講曬成集出嚟添，哈哈！
中環夜景 (重遊龔水2019.03.16定情之地)、浪漫單車遊，充滿回憶、好有feel、令觀眾心動嘅一集！依一集，就如我上篇文所講，「畫面拍到有正劇感覺但同時故事保留翻處境劇嘅味道。」處境劇嘅味道，即係點？劇本題材貼地，探討普通情侶日常生活可能會遇上嘅問題。cp角色 (i.e.龔水) 共同經歷事件，互相磨合，了解對方，令感情昇華更進一步。仲有，透過劇中唔同角色嘅互動 (i.e. 職場新丁嘅睇法、交流；洋洋俊華拍拖方式對比；姐妹們傾計 etc.) 帶出唔同訊息，引發觀眾反思、討論；係有意義、有思考性嘅。
甜，當然係好甜，甜到入心。但我睇到嘅，唔係單純高濃度嘅戀愛糖，而係結合搞笑、互動、驚喜、甜蜜、溝通，除咗展現龔水嘅日常戀愛故事，全集唔同情節亦都引發我多方面去思考。
情侶/夫妻間為對方製造驚喜，係戀愛其中一個課題，可以係一個學問，值得諗一諗。
Why?
點解要製造驚喜俾對方？
Because of 習慣，日子耐咗，關係踏入咗隱定期，老夫老妻mode，情侶間嘅熱戀感覺可能會慢慢減退。為對方製造驚喜，凖備同等待過程都充滿住神秘感、新鮮感，的確係維繫熱戀感覺嘅好方法。
How & What?
咁應該凖備 & 製造咩驚喜俾對方好呢？點先至係「浪漫」、「唔老土」？
依集一開始嘅市場部戲，就用咗後生、岩岩踏入社會大學嘅千禧bb (Marketing 新丁) vs 就嚟變「老餅」嘅80s (龔生) 嘅諗法，帶出兩代人思維模式嘅衝擊。
/Marketing 新丁(千禧bb)：溝女最緊要跟得上潮流，想知女朋友係度做咩，玩snapchat啦！依家邊有人寫情信同玩交換日記㗎，勁八十年代，老土到爆！/
/龔生 (80s )：我又唔覺得喇！Snapchat 我都識，但係依個年代可以親手寫字嘅話，我覺得更加可以表達到誠意。唔係八十年代，經典係永垂不朽嘅。/
每一個年代都有個代流行嘅嘢，有唔同嘅潮流指標。隨住社會進步、時代變遷，昔日嘅「潮」會逐漸變成“out”，但當年曾流行過嘅每一嘢，大家都必定記得好清楚。80s同00s，大家生於唔同年代，成長時期嘅社會狀況不一，隔咗成20年咁滯，無共鳴感都唔出奇呀！所以我就唔認同千禧bb用現時依一刻嘅「潮流」去定義「浪漫」/ 老唔老土 ~
學農夫話齋：「唔係舊，係classic！」經典係永遠長存㗎，千禧bb ，識咩啊～哈哈！
我自己無經歷過80年代，唔係好清楚80年代流行啲咩，以前細個亦比較少睇電影。雖然Ep. 907所提到嘅 《甜蜜蜜》、《喜劇之王》係90年代嘅產物，但細個到依家一直都無睇過嘛，所以我睇live嘅時候，對於龔生所用到嘅經典電影情節冧女確係無好大嘅共鳴感。不過，我個人就好認同龔生嘅說法喇！
親手寫字，誠意滿滿。無錯啊！親手寫，一橫一直、一撇一捺，每個人字跡嘅、大小、形態、力度、傾向都唔同，各有風格，係帶有情感嘅文字，所以收信人細閱時可以好真實咁感受到對方當刻嘅心情。相反，手機裏面嘅短訊文字，每粒字嘅形態一式一樣，的確有種死咕咕嘅感覺，冇乜感情。手寫信/日記仲有一個嘅特別位 - 就算畫畫唔叻嘅人，寫信時都可能會加插一啲自創公仔畫，令封信睇落生動啲。一個好簡單嘅哈哈笑公仔，每個人嘅畫法都可以好唔同，獨特無比，比起手機裏面嘅emoji更得意、更有趣、更有創意呢！
我自己有一個習慣，每當我身邊嘅好朋友/同事生日或者last day，我都會親手整手作卡+親手寫字送俾佢哋留念，每一個人、每一次、每一張手作卡都唔同。每次整卡最大滿足感，就係見到收卡嘅人開心。見到佢哋收到卡時候嘅驚喜、臉上嘅笑容，我都會好開心，無論要花幾多時間去整都係值得！前幾日，我有個好朋友兼前同事同我講佢近排回味緊我一年前送俾佢嘅手作生日&last day卡，佢一邊睇一邊諗起以前嘅點點滴滴，勁正。嗯，就係依種感覺啦！我自己間唔中都會摷翻以前同學仔送俾我嘅生日卡呀、聖誕卡呀、畢業紀念冊呀出嚟睇。每次一睇，就算已經隔咗好多年，回憶湧現。相反，手機裏面嘅訊息實在有太多速食對話，真係好少會拎出黎欣賞、再三回味。
所以，寫情信/日記係老土？我就唔覺得喇，係有意義、有心思、有誠意。我鍾意啊，幾浪漫呀！
無論係沙灘心型蠟燭、緣份遊戲、琴室四手聯彈定重演《甜蜜蜜》單車戲，龔生每一次嘅big suprise冧媽呢空都係諗過度過，有花心思去設計同俾心機去準備，而唔係就咁買包包，我好欣賞呢！回憶係無價嘅，情侶間一齊做一啲嘢，製造回憶，回憶片段長存係腦海入面，俾起送禮物更加有價值！人去到某個年紀，總喜愛想當年。他日大家回想起某年某月某日嘅驚喜，一齊講、一齊哈哈笑，係我同你(妳)之間曾擁有過嘅共同回憶。咩橋都好，老唔老土都好，無所謂啦～ 當中有你(妳)，點老土都係甜嫁！大家一齊老土過、一齊笑過、一齊開心過就得，係咪😊～
講起老土，其實每個人都有自己特別鍾意嘅嘢，真係無話老唔老土。媽呢空亦都一樣。Ep. 357「 水的K戀」，媽呢空突然係餐廳好陶醉咁唱「鳳陽花鼓」🤣，就算俾好姐妹當面笑自己音樂品味獨特、咁「娘」(老土)、匪夷所思，水水都無太上心/太在意。💧：「依首歌我好鍾意嫁！」。我鍾意就得啦，嘻嘻😚～ 爽朗水，真係活得開心、活得自在，俾姐妹們笑完繼續堅持做自己，好開心咁繼續唱。水的老土，龔記得嗎？嘻嘻，媽呢空咁鍾意「鳳陽花鼓」依首歌，得閒可以同龔生一齊唱，一齊娘，yeah✌🏻!
When?
紀念日、生日、節慶日情侶一齊慶祝，製造驚喜俾對方，當然少不免。原來龔水之間仲有個每月之約定，每月14號都要輪流安排驚喜俾對方，不知不覺間已經玩咗一年零三個月。2020.06 龔生心情唔好，發晦氣話：「都玩咗咁耐啦，開始有啲悶啦，同埋費事俾你話我老土、無新意......」的確，每兩個月就要安排big surprise 係會有啲頭痛嘅哈哈，尤其係兩位都係接龍高級職員，平時工作已經忙到抖唔到氣，仲要諗有新意唔重複嘅驚喜，有難度呢～ 不過，新意重要啲定心意重要啲？媽呢空話：「男女朋友拍拖，最緊要係有心！」嗯，所以龔生俾啲信心自己，你有用心預備，媽呢空feel到㗎！
比起固定嘅慶祝、big surprise，我更加鍾意出其不意嘅日常小驚喜🤩～ 其實呢，龔生平時有好多得意諗頭冧媽呢空，無論係拍拖前嘅無限 P 圖、情人節Message用符號砌花，定拍拖後近期嘅北海道長腳蟹早餐、「I LOVE YOU」媽呢空素顔瞓覺樣拼圖、媽呢媽呢空黑松露醬炒蛋、易拉架一比一龔水合照、趁媽呢空瞓咗偷偷地戴上求婚戒指selfie等等，真係估佢唔到，龔生愛在細節中，好有驚喜，一啲都唔老土呢！難怪媽呢空話：「平時你氹我，俾驚喜我嘅時候，我都好feel都你嘅誠意㗎！」
其實，有時唔使有咩鋪排、準備，只係一個好簡單嘅親密小動作/行動都可以令對方有驚喜，係生活小情趣呢！龔生係依方面真係做得非常好！無意間拖拖手、摸摸頭、摸摸面、按按摩、抱一抱、煮飯仔Back hug、幫媽呢空冚被等等等等，依啲小動作都會將兩個人嘅距離拉近，「天天都是熱戀期」，好寵水、好窩心、好幸福嘅感覺喔！而媽呢空嘅日常驚喜，當然係[真] 食蕉連皮啦，ahahahah，Kung Shui Signature!!
(睇龔水係劇中嘅情侶小動作，隔住個mon都feel到佢哋滿滿嘅愛意，令到觀眾都好有戀愛嘅感覺呢😍！)
係喇，除咗龔生日整蛋糕同愛心飯盒之外，唔知媽呢空平時仲會做咩氹龔呢？好想知多啲啊！。話時話，7月輪到媽呢空俾驚喜龔生喎，唔知媽呢空準備成點呢？
Who?
當然係你最愛嘅男(女)朋友/老公(老婆)啦！為對方製造浪漫嘅驚喜唔容易㗎，要花心思、精神、時間、金錢去預備，所以鍾唔鍾意個驚喜都好，別忘記向對方說一聲「多謝你(妳)」喔！
所以，浪漫的驚喜是什麼？
是不在乎禮物貴不貴或橋段老不老土，只在乎你/妳有沒有重視彼此、真心真意去對待，用心製造屬於兩個人的甜蜜回憶💭，感受彼此之間濃濃的愛意💞。
依個題材，唔錯唔錯。依一集，嗯，啱我口味。最重要嘅係貼題，成集由到尾都係圍繞住「老土」vs「浪漫」，貫穿全集。若果同Ep. 891 求婚個集有linkage，就更加好。(係熊家求婚成果之後，龔生話原本當日嘅求婚計劃係想帶媽呢空去一個好浪漫嘅地方向佢求婚㗎，唔知係唔係中環定情之地呢？）
幕前幕後整個團隊，編、導、演各方面嘅誠意用心，觀眾係深深感受到嘅。的確有心思嘅一集，所以我鍾意😊。黑暗期過後終於可以欣賞到貼地、有質素、有鋪排、有驚喜、冇悶場嘅龔水主線，心裏感到安慰，當然鍾意，鍾意龔水依一種嘅互動、相處模式，好舒服。
龔水萬歲！
🎊🎊🎊🎊🎊
誰不知。。。。。
一啖🍯，一啖💩……
//Ep. 919 戲迷情人 (Ivan May 主線，龔水副線🤮) | 2020.06.26 //
頂，Ep. 907一切美好嘅感覺，Ep. 919只係幾句完全non sense嘅對白&情節就被破壞曬，粉絲一下子被打沉，完全消化唔到發生咩事😭......好嬲😡。
919 集，有如集數數目一樣，1999😪，做乜🐶，好嬲😡。
4、5月已經黑暗到一個點，但原來低處未算低，龔水經歷過Ep. 869 Ending、Ep. 891 求婚、Ep. 907 互相溝通諒解，仲可以出現919集啲🤢垃圾劇情，我真係好「驚」喜，驚多過喜呀，好嬲😡。
老實講，我一直都鍾意睇接龍花生三友，覺得佢哋3個好有處境劇式喜感，每次過場啲對白、動作都好抵死、好好笑，睇到我好開心。所以佢地開始各自有自己嘅主線，Ivan 開展第二段愛情cp線，我都替佢哋3位開心。本身 Ivan May 組cp完全無問題，Ep. 919 Ivan 係 八千公食飯俾驚喜May，博佢一笑，但就不停出現蝦碌場面，ivan 追女「失敗」，依幕幾好笑呀～ 我睇live嘅時候係有笑出聲，演Ivan嘅演員有俾心機去演，睇得出嫁！(題外話，我以前都有睇同事三分親&畢打自己人，我都鍾意！雖然故事內容我就唔太記得喇，但到依家仲記得有gary依個角色，當年gary同marco拍住上，觀眾傻傻分不清成日撈亂你地兩個個名～哈哈)
明明Ivan May 可以好好咁發展落去，點解某編劇硬係要拉埋龔水一齊講，寫埋啲令人煩厭嘅四角複雜關係，搞龔水？好嬲😡！我真係唔明編劇組諗緊乜？！Ivan May可以有好多可能性，一個月扮拍拖，可以講下依一個月裏面發生咗咩趣事，扮咗一段時間May對Ivan嘅印象又點樣，有冇多咗好感？但編劇完·全·冇·寫，一開場就話Ivan May就嚟扮完拍拖，😦 我心諗：吓，咁快就完？？？明明上星期Ep. 912 「假的開始」(2020.06.19) 先話要扮，7集7日之後，Ep. 919 (2020.06.26) 一開波就話扮完？所謂嘅一個月呢？開心大發現，原來開心速遞嘅時空，一星期 = 一個月。哇，咁龔水嘅兩年婚約咪好快到🤗？！咪ff咁多啦，編劇組邊有咁好呀🤭）
依集Ivan + May嘅劇情無咩問題，但所有有關龔水、龔水may、龔may嘅垃圾情節，我極之恨不得立即掉去垃圾桶🗑，呀，不不不，係焚化爐🔥🔥🔥，狠狠咁一把火燒咗去，灰飛煙滅，我要依集同龔水有關嘅部份永·永·遠·遠、徹·徹·底·底咁消失係我腦海入面，好嬲😡。
關於依集劇情，我無太多嘢想講，唔想浪費我嘅精力係啲垃圾劇情度，講4點：
[P.S. 為咗cap圖做evidence，我勁折墮咁打開Ep. 919，再次睇到啲🤢non sense 劇情，我又想喊，好嬲😡。呀，大家睇完以下cap圖記得立即洗眼同del memory]
[1] 龔水May工作以外三人行一齊食飯、睇戲，已經夠曬odd夠曬離奇嫁啦大佬。不特止，係餐廳食飯嘅時候，水水仲趁龔生走咗，同May(龔生個ex)呻話龔生真係好老土，用經典電影情節氹女朋友好老土，自己唔欣賞（如果龔生知道媽呢空咁講，仲要係自己ex面前講，肯定好hurt😭 某編劇寫埋啲咁嘅對白俾水水，我都好hurt😭）。睇到依幕真係黑人問號問號問號❓❓❓明明Ep. 907嘅編劇好清楚好清楚好清楚講水水係接受&鍾意緣分遊戲、經典電影情節嘅驚喜，仲安慰龔生唔好理人點睇，我哋(龔水)鍾意開心就可以，老土又如何呢？所以，龔生老唔老土，關阿May咩事呀大佬？？？Ep. 919 嘅編劇，你特登玩嘢呀？當認真追睇開心速遞嘅觀眾傻嫁？頂，某編劇肯肯定係特登咁寫，令到其他電視撈飯嘅觀眾有錯覺，覺得龔同水唔岩key，水係龔背後講自己未婚夫壞話，搞到水勁衰咁。呀某編劇，請問你有冇尊重過熊若水依個角色，有冇尊重過Ep. 907嘅編劇，你咁寫係有咩居心？頂，好嬲😡。
[2] 明明Ep.869，呀某編劇自己寫龔生解咗心結之後都唔會唔會唔會翻撻初戀前度，仲好man好霸氣係阿爸、Mary、May面前講「Mary比May更好」、「總之以後斟新抱茶俾你嗰個一定係Mary依個女仔」。龔水已經訂咗婚嫁啦，打風都打唔甩。我熟悉嘅龔生，係個用情專一嘅好男人，媽呢空對佢非常重要，佢一早已經認定咗媽呢空係佢唯一嘅女人，何來會覺得龔生有機會抵擋唔到初戀嘅魔咒呀？？？What？可能係我比較敏感或者解讀唔到，某編劇寫依句對白到底有咩意義？係咪另有意思？？？
[3] Ivan 誠心追女，但可惜，做咗一隻可憐兵，慘。
[4] May 依個角色係某編劇筆下簡直係一百個趣，簡直係「神」，神又係你，鬼又係你，你·玩·曬。彈出又彈入，表裏不一，自打嘴巴，口不對心你·最·勁，邊個夠你嚟呀 may 姐。嗱，我係有圖有真相，唔好話我亂講啊🤗～
- Pic 1: May 係特登想做龔水電燈膽，仲唔俾我捉到你係度講大話🙃。May係好人，are you ___ing kidding me?
- Pic 2: 之前Ep. 869 May同Mary講自己唔會再諗初戀前度，會放手，祝福龔水。之不過，原來May仲keep住初戀前度嘅舊相，不特止，仲會係office日J夜J，好唔捨得想翻兜咁嘅款。阿may姐，說好的放手呢？若果你係做唔到嘅話，就唔好口響響話自己唔會再亂諗嘢，同埋好心May你就避忌吓，乜做電燈膽好好玩？仲有，你係office肆無忌憚咁J前度嘅舊相，人地龔水已經訂咗婚嫁，請問May你有冇尊重過真心對待你嘅朋友Mary? May嘅「衰」，深藏不露，表面一套底一套，依種人先至係最·可·怕 😨
只睇依幾幕，已經怒火中燒🔥
「喺呢個Moment，我要爆啦.jpg」☄️☄️☄️☄️☄️
頂！！！
我唔會否認有觀眾係非常之enjoy睇Ep.919多角關係感情牽連嘅🤢劇情，仲覺得好鬼過癮。正常有頭腦、有認真睇整個龔水故事嘅觀眾都知道，到目前為止係無真真正正出現過第三者爭仔嘅劇情。但好明顯 Ep. 919 裏面嘅對白、表達方式、鋪排，劇組都係刻意營造緊錯綜複雜嘅四角關係。依啲橋段、表達手法搞到無論Ivan May cp 線定龔水cp線都極·之·難·睇，極·之·趕·客。Ivan May 線岩岩先開始咗2集，觀眾對於依對新cp嘅感情同投入度尚淺，某編劇你鍾意用埋啲老土正劇式橋段去寫依兩個角色嘅戀愛故事，我隨便你。我只會睇，食著花生咁睇，唔會投放感情落對cp度。但龔水故事係由2017年12月開始發展到依家700幾集，over 2年半，觀眾對龔水依兩個角色 & 龔水cp故事線係建立咗深厚嘅感情嫁大佬。4、5月龔水may線搞到咁難睇🙄，算，已經完咗，忍你。依家明明係Ivan May感情線，佢地兩個咪好好咁自然發展lol，我頂，做乜🐶又翻轉頭「炒」翻起龔水may呀？？？ 呀某編劇，你拖龔水落水插入Ivan May感情線究·竟·係·咩·心·態？？？見到龔水俾劇組「擺上枱」，我心愛嘅cp角色俾某編劇係咁「虐待」，嬲😠，好嬲😡，激嬲🤬！今次仲牽涉埋Ivan，難得有新cp線，但故事個頭搞到咁🤢，我都替 Ivan 依個長註角色慘 (「默哀」3分鐘)。
複雜關係好精彩、好有戲、好有feel？Sorry，我丁點都唔覺得。重複上篇文提到嘅point：若果想睇正劇式三角/四角/n角關係劇情嘅話，我倒不如去睇8:30, 9:30正劇啦，點解要睇8:00處境劇？仲要係名為「開心速遞」嘅處境劇？麻煩某編劇分清楚正劇同處境[喜]劇嘅分別。若果某編劇繼續執著堅持嘅話，真心覺得你最好就過組翻去寫正劇。除非你同Ivan一樣係m底，好鍾意好享受俾人問候。之不過，你自己鍾意俾人問候係你嘅事，觀眾可以話係你嘅”client”，真心麻煩你尊重角色之如尊重翻自己嘅職業，唔好不斷搞破壞hurt觀眾。
哈，其實我應該要佩服某編劇，佢真係好鬼勁，勁「高招」咁合理化令人反感、嘔心嘅劇情，令到心愛龔水cp嘅觀眾墮入「勁陰濕」嘅圈套☠️......唔可以鬧may㗎，佢係一個「好人」嚟㗎，因為一個「美麗」嘅誤會令到佢同前度分開咗咁多年，依家又冇機會翻兜，佢好無辜㗎知唔知道呀😢，我哋應該要有憐憫之心㗎😢。同埋，佢又冇做第三者擺到明搶仔，最多成日拎著前度張舊相自己日J夜J，日ff夜ff啫...哼，你哋做乜咁🖤話佢啫😟！
嗯嗯嗯係啦，唔係某編劇嘅問題唔係佢嘅錯，最錯係班唔識欣賞嘅觀眾～ 我哋咁樣話阿may完全係我哋唔啱，係我哋一個二個心胸唔夠廣闊，係我哋唔識尊重角色！你啱呀，我哋咁樣對may係我哋衰，我真係好對唔住！
(🤢，打曬冷震)
由4月1號開始，龔水故事充滿著一個又一個一啲都唔好笑嘅笑話，過山車般嘅劇情發展令到觀眾心情大起大落，少啲心血都唔得......雖則2年半以嚟，龔水粉絲應該俾劇組訓練到有強大嘅心臟，但都唔係甘願俾劇組多次咁玩弄嫁嘛😰？！劇姐「曬冷」，去到一個接近不可收拾嘅地步，依家依個局面，到·底·係·咩·一·回·事？ 龔水故事個頭開得咁好，水準一直都好平穩咁高質 。雖然以前某一兩集嘅劇情都會有失手，但整條故事線嘅質素係有保證，所以吸納到好多粉絲鍾意、一直追看、真心支持。大家有要求、有期望，唔想龔水角色、故事被毀，實屬正常，岩唔岩？
「完了吧 ，如無意外，從今開始該好好戀愛。放下從前一段感情，才能追求將來......」真真正正放低放手，等如放過自己、放過其他人...... 寫May嘅編劇大人，你明唔明？你願意面對、願意放手、願意收手未？
(Ep. 919 Ending，似乎留有🤢伏筆，等下集Ivan May主線再講。頂，唔好俾我又見到個段嘔心嘅「疑似」四角關係，完·全·無·興·趣，完·全·唔·__·想·睇，好嬲😡。
夠啦，夠啦，夠啦。
如果之後集數再有依啲糾纏不清四角關係嘅劇情出現，May仲係死唔斷氣對ex感情牽絆，特登寫衰龔生/媽呢空，嚴重影響觀眾對龔水故事嘅觀感，精神上「虐待」粉絲嘅話，我真係唔想客氣，火山爆發都似🌋)
【劇組，你好嘢！很愛辣㷫大家？很愛負評？】
少年太年輕了，某編劇咁有「特色」嘅愛情觀，我哋啲普通人識條鐵咩？！某編劇繼續有性格自我感覺良好，係我哋班普通觀眾「膚淺」，唔識欣賞「高級」正劇式作品咋嘛！創作自由，唔係唔想尊重編劇們嘅創作，但excuse me，請問劇組有冇尊重廣大正常觀眾嘅感受？有冇尊重以前整個團隊用心塑造龔水角色嘅努力？有冇尊重晚晚捧場、真心支持好角色好演員嘅忠實粉絲？點解我上一篇同依篇內文多次提及「劇組」？開心速遞劇組強調「一家人」嘅概念，作品製作係講求團隊合作、各方面配合，係整個團隊嘅努力，我非常認同。所以，若果整個劇組，尤其係把關要員：編審、導演、監製，咁多人通通都覺得4、5月龔水may老土誤會三人行故事 + 919集「疑似」四角關係嘅橋段、龔水May三人行去睇戲、食飯+餐廳食飯時嘅三人對話係完全無問題嘅話，我會非·常·失·望，仲覺得有點心寒......
我覺得，依家嘅開心速遞劇組好似再唔係以前開開心心、追求故事質素、虛心聆聽接納觀眾意見、帶俾觀眾歡樂美好回憶嘅劇組......自從tbb決定2020年一星期播足7日...自從開心速遞全盛時期嘅編劇好似一個又一個唔見咗好耐冇再寫開心速遞劇本...自從不斷有新編劇加入/回組，我總覺得有股「惡」勢力入侵劇組，嚴重失去協調......
觀眾有觀眾不斷爆seed表達意見；編劇有編劇繼續閉門寫自己鍾意嘅嘢，懶理你地班觀眾，然後用劇中角色把口話我哋啲普通觀眾係度嘈唔識貨；演員有演員「無奈」繼續演出......
(眾所周知演員係被動嘅，同普通低層打工仔一樣邊度有話事權呀。打工仔想留低就要乖乖地配合，膠層order叫你做乜就做乜冇得你反抗，除非你有足夠勇氣把心一橫炒老細魷魚唔撈嫁咋......唔知演員收到依啲劇本溫習時候嘅心情、真實感受其實係點樣......真的enjoy嗎😶？我自己都係一個職場小薯低層打工仔，You have no choice no say，just follow...演員「無得選擇」嘅難處，我自己都經歷過所以好明白。唏噓咁講，「現實世界、職場就係咁PK咁荒謬......」，有時真係好·無·奈，但都要硬食，慘。所以我會欣賞就算劇本爛到一個點仍然俾心機做、交足戲嘅演員。開心速遞的確有唔少有演技嘅好演員，邊個有用心認真去演、花心思諗計去演活角色、默默努力改善演技、不斷進步，觀眾係有·眼·睇而且分·得·好·清·楚！）
當然，我只係一個非常普通嘅觀眾，確實唔會知道所有嘢背後嘅「真相」，所以盡量叫自己唔好做太多無謂嘅猜測。但我好想講嗰啲懶係戲劇化過曬時嘅正劇式拖拉劇情真係超·級·難·頂。為咗所謂嘅戲劇效果、刺激感，一次又一次破壞觀眾心中角色形象、整條線整個故事嘅觀感，大佬你叫追咗幾年開心速遞嘅忠實粉絲點繼續支持落去呀？認真，今年開心速遞有好多集嘅劇本其實唔係咁掂，有時係靠演員演技支撐先冇咁難睇咋......
每個人都有發表意見嘅權利，你完全接受到咁樣嘅劇情情節係你個人嘅事，你有你鍾意滿意，人哋有人哋唔鍾意唔滿意。人人平等，你我他都只不過係一個坐喺電視機前觀賞節目嘅普通觀眾，真係有必要將自己放在高處然後公開話唔滿意劇情嘅觀眾唔識尊重劇組？講真，容許唔合理會令觀眾發火嘅劇情出街，整個劇組應該早有心理準備廣大觀眾會唔鍾意、負評。劇組寫得出、拍得出、播得出就要承受翻個後果...唔好有觀眾表達唔滿意嘅時候反而串肯發聲憑心講真話嘅觀眾唔欣賞、唔尊重劇組。大家嘅怒氣，係多個月累積而來，正所謂唔__唔鬆化，有時候說話係會難聽啲，但換個角度諗下，係邊個不停咁一次又一次挑戰觀眾底線，令觀眾忍無可忍，要爆seed？
對劇組有要求、會認真睇劇嘅觀眾係絕·對·唔·會盲目地撐劇組，唔會只要有自己鍾意嘅男神女神係螢光幕前出現就得就好滿足。有心嘅觀眾係有讚有彈有理據，睇完發現有唔妥當就如實表達，講吓有咩位覺得唔合理&咩原因睇到唔舒服唔開心，就算嗰個問題係出現喺自己心愛嘅角色都唔·會·盲·撐。若然覺得有意見就等於唔支持、唔尊重，哈哈哈哈哈，依種邏輯思維我依啲平凡人確係理解唔到！容許我大膽咁講一講，世上的確有人對於自己鍾意嘅嘢只·可·以·讚，少少批評都唔容許；但對於自己唔鍾意嘅嘢就去到好盡，瘋狂咁鬧，有趣有趣！「人生百態，笑笑看待」，嘻嘻嘻～
我自己分得好清楚，角色還角色，演員還演員；角色係編劇筆下嘅產物，演員嘅職責只係按編劇嘅設計&導演嘅指示、要求揣摩角色，然後用心演繹。好多理智觀眾所表達嘅意見都係圍繞劇情、故事觀感、角色設定嘅問題，同演技無關嘅話係唔會扯上演員。我上一篇文講過，「龔水粉絲咁上心，係因為大家真係好鍾意、好欣賞、好尊重龔燁同熊若水呢兩個角色呀！」就係因為大家都真心愛角色先至唔·忍·心，唔想編劇不停催毀受歡迎角色嘅形象魅力，唔想再次見到自己欣賞嘅演員演埋啲得唔到觀眾認同嘅爛劇本，唔想因為某啲編劇嘅non sense作品一下子推翻曬以前整個劇組用心鋪龔水線嘅付出同努力，明白嗎？所以，我覺得唔應該將角色、演員撈埋一齊嚟講。搞清楚個logic，網民對於角色嘅設定、角色所做嘅行為、角色所講嘅對白有批評有意見唔等於我哋唔支持演員演出，okay? 鬼唔知演員只能夠跟劇本做咩🤷🏻♀️ 正正因為咁，理性嘅網民先花時間心機分析劇情發展嘅合理性，然後係唔同平台提出建設性嘅意見，希望劇組聆聽，希望編劇正正常常寫翻啲高質劇本，希望演員收到好劇本盡情發揮，然後播出街嘅時候觀眾睇得舒服開心、衷心讚賞。而唔係某編劇筆下嘅角色有問題仍一面倒只許讚、避重就輕、唔準彈、全力盲撐，等劇組自我感覺良好先至為知好🙂，哈！
講真，係正常人都鍾意俾人讚嫁啦，有邊個鍾意不停咁俾人鬧呀，同樣地有邊個觀眾鍾意成日嘥精力時間口水去鬧呢？我感覺到嘅係，每當出現「負面」評價嘅時候，有好多人都唔願意去思考點解人哋會有咁樣嘅評價/challenge，唔想承認係出咗問題，只覺得批評者雞蛋裏挑骨頭麻麻煩煩搵嘢嚟鬧。無可否認世上存有無理取鬧嘅人，但同時有好多人係真心想件事好、想劇組多加留意有進步，先至勇於提出意見。個人覺得，胸襟廣闊、願意正視問題、大方接受批評、真心尋求改進嘅人，先稱得上係真·漢·子。所謂嘅玻璃心，就係啲只容許讚賞唔願意接受合理批評嘅人先至會有😌！
現實就係如此殘酷，唔係話劇組叫做有努力過好辛苦，就「強迫」觀眾認同鍾意。要得到廣大觀眾真真正正咁俾like，問心，最低限度大家都覺得嗰集嘅劇本係合理、能夠接受、整體質素達到合格水平先，啱唔啱？每個人有優點有缺點(/弱點)，同樣每個作品都有好有差嘅地方，當有失手有做得唔好嘅時候就大大方方接受批評，認真思考觀眾提出嘅意見，諗方法作出改善，唔再重蹈覆轍，用實力證明俾觀眾睇，無論劇組幾辛苦都好仍有能力製作一集又一集高質素、受歡迎嘅作品。
兒時有老師提醒過我，「不要為失敗找藉口，要為成功找方法」，我自己就好認同啦！
大家都知道好chur好辛苦，但我覺得唔好用辛苦嚟做藉口。問題出現了，觀眾反映了，機會給予了；團隊就齊心諗諗計搵方法去解決，等觀眾對劇組(esp. 編劇們) 重拾翻信心；依個先係觀眾，尤其係忠實粉絲，希望能夠見到嘅成果。觀眾睇得開心，滿滿嘅讚賞，劇組又開心，成為動力，珍惜觀眾，製作更多好作品，觀眾賞析真心支持，win-win 良性循環。
【回不去了的感覺？】
相信好多龔水粉絲同我一樣，每每重溫以前嘅龔水集數或者欣賞粉絲製作嘅龔水MV，睇到以前獨具一格、貼地寫實、幽默風趣、細膩動容嘅龔水成長故事，感慨不已。
以前，龔水主線集數與集數之間係有緊密銜接、有伏筆、有認真鋪排，細節位係唔同集數前後呼應，龔生「復仇」+ 龔水職場戀愛故事一步一步build up上去，引人入勝，有味道的，讓觀眾慢慢細味。
龔水故事初期 (2017.12.18 - 2018.03.20)
Ep215 「賤精來了」、Ep266「心戰」、Ep267「報仇記」、Ep279 & 280「燁來越愛你」
回水後 (2018.07.05 - 2019.03.14)
Ep357「水的K戀」、 Ep376 & 377「水的燁緣」、Ep389「愛情當入樽」、Ep391「龔燁大鑊了」、Ep392「真命騙子」、Ep398「戰鬥吧！蠢人兵團」、Ep409 & 410「接龍麻雀王」、Ep415「龔燁的秘密國度」、Ep428「我不是曹太」、Ep444「艷照攻略」、Ep448「選戰」、Ep454「初雪的約定」、Ep463「龔燁的No. 1」、Ep489「水與下屬們的藍調」、Ep503 & 504「龔燁復仇記」、Ep522「狗公，狗龔?」、Ep530「大小姐的尿袋」、Ep534「白色情人節」
拍拖後 (2019.03.18 - 2020.05.29)
Ep 536「地下情有著數」、Ep 541「活得自在」、Ep 557「愛情的考驗」、Ep 579「霸道總裁與大方女友」、Ep 671「龔燁不壞，若水不愛」、Ep 682「姐妹的秘密不是秘密」、Ep 701「咪當我阿四」、Ep 704「龔家好新抱」、Ep 745「愛我請計劃」、Ep 772「最珍貴的寶藏」、Ep 788「 雷。停救兵」、Ep 788「 爸爸的寶貝」
訂婚後 (2020.05.30 - NOW)
Ep 904「錯的替身」、Ep 907「老土萬歲！」
以上集數，係我個人比較喜歡嘅。雖然以上所提到嘅唔係全部都高汁到我會不停翻loop，但都係好睇嘅。基本上龔水故事初期 + 回水後到拍拖最初期，集集精彩，應該所有主線副線我都鍾意。
講到最愛最愛嘅幾集，當然係 Ep266「心戰」、Ep267「報仇記」、Ep279 & 280「燁來越愛你」、Ep376 & 377「水的燁緣」、Ep448「選戰」、Ep454「初雪的約定」、Ep503 & 504「龔燁復仇記」、Ep534「白色情人節」、Ep 579「霸道總裁與大方女友」、Ep 704「龔家好新抱」、Ep 907「老土萬歲！」
經典集數翻睇、翻睇、再翻睇，再三回味。經典，之所謂經典，就係無論幾多年之後重溫，重溫咗幾多次，再次翻睇嘅時候，仍然一個字：「好正」，好有動力又再由頭追過條故事線。
「感謝劇組曾經的用心，製作一集又一集高質、追看性高、令人賞心悅目的龔水故事。」
「曾經的精彩，曾經的經典，一切只能在回憶裏尋找......」
現在，還有一些有質素的龔水集數，可惜真的不多，若以整條龔水故事線來說，用心程度，大不如從前......已經回不了以前一集一集環環相扣、扣人心弦、精彩高水準、令觀眾緊張期待故事往後發展的感覺。以前留下的伏筆，編劇們早已忘記得一清二楚......
拍拖後期到訂婚集數嘅質素...明顯下降咗好多......
依家嘅龔水，過場正正常常，偶然有驚喜。但一去到某幾個編劇寫嘅龔水主線(4、5月個啲呀🙄，仲有Ep. 669「只想你包庇」Ep. 813「熊不甩」熊若水嘅人設變到黑人問號😑)，內容淺薄，唔夠深入，唔夠鮮明，滿有雜質，實在有太多可以刪除嘅枝節；欠缺細緻度，刻劃吾夠深刻，有啲觀眾想知多少少嘅過程冇寫冇呈現出嚟，只用對白口頭輕輕帶過/完全冇提，作為觀眾嘅我成日覺得好似miss咗好多嘢咁；觀眾唔想知唔想見到嘅情節卻佔用咗好多airtime，令人眼冤🙄......
最可怕嘅係，龔水都已經訂咗婚，但為咗鋪Ivan May新cp線⁉️，仲死唔斷氣出現翻我極之唔想見到嘅龔水May工作以外三人行情節，May仲日念夜念前度龔，「陰魂不散」，極·之·可·怕...... 當日一幕幕令龔水粉絲唔舒服嘅劇情，我一路睇眼淚不斷在心裏流，好心酸好心痛，比起4、5月更加痛，個心真係好似穿咗個窿咁樣，哭哭......對劇組嘅信心受到動搖，惴惴不安，絕望感upupup。May藕斷絲連、前度影子、「疑似」多角關係等等嘅套路真係非·常·趕·客。
「過去了、過去了、過去了」，龔水還龔水，Ivan May 還 Ivan May，各自好地地發展唔得嘅？點解要拉埋一齊講，搞到咁複雜，吓？(頭痛😷)
我個人重質不重量，我真係寧願龔水係Ep. 919唔出現，唔出現唔被破壞就唔會傷心......2020.06.26 Fri 睇完Ep. 919，傷心完，冷靜落嚟，我問自己，點解仲要堅持落去？
一個字「愛」，真心愛龔水，真心欣賞演員，捨不得放棄。
演員努力用心演出、默契依舊；拍攝團隊流著汗水日拍夜拍，務求呈現優質畫面，值得觀眾支持。但劇本、整體劇情發展總有跟唔上嘅感覺，好可惜好可惜...... 「劇本，一劇之本」。好多人講過，劇本劇情爛，有幾好幾出色嘅演員、幾優秀嘅拍攝團隊都無用，只會做成浪費。唔係話想強烈地逼迫編劇組，令到編劇們好大壓力。今年一星期播足7日，流水式，編劇為咗趕上進度，馬不停蹄地度橋日寫夜寫，腦部不停運作就嚟缺氧，唔容易，明白嘅。我唔奢望集集主線副線都精彩完美無暇，但請編劇們保持翻應有嘅專業，無論你係新加入定一直都在， 落筆前做好功課，認真去對待每一個編劇組幾年嚟努力所塑造嘅角色、所寫嘅故事線、所建立嘅形象。Be thoughtful , be considerate，請編劇尊重角色、尊重整個團隊、尊重觀眾；唔係自己鍾意寫咩就寫咩，不停咁搞破壞，破壞觀眾對龔水故事美好嘅感覺，挑戰觀眾嘅底線，令忠實粉絲氣憤傷心。(同時希望重要嘅把關要員，好好把關，好好處理，別讓問題一直存在唔解決，令觀眾失望、失信心。)
縱然劇組一次又一次玩弄觀眾，但到依一刻，仍有不少網民係唔同平台大篇幅咁打觀後感、分析劇情、提出意見，這，證明了大家仍很愛龔水。心，好痛好痛，但還未想放棄。
建立好故事、儲角色人氣、吸納粉絲喜歡真心支持，需要一段長時間，並非一朝一夕就做得到。反之，破壞、摧毀一個角色，呯呯呯，一下子就搞掂。「建立難，破壞容易」，顯淺嘅道理，相信大家都知道明白。持續嘅破壞，不斷消磨觀眾嘅意志，他日沒有人再認真留言評論&真心提出意見，那大家已是無癮了、心死了。想補救？恐怕已經太遲了......
「沒有期望就沒有失望」，「不期待就不會受傷害」。
每個人嘅容忍度都有限，今日嘅我，已經失去咗信心，去到一個對劇組再冇期望嘅境界......劇組無好好協調達成共識，一次又一次容許唔合乎常理、普遍觀眾唔接受嘅劇情出現係龔水故事；編劇組唔再好似以前咁俾心機好好地寫龔水線、唔再認認真真去鋪排，依個係鐵·一·般·嘅·事·實......一次又一次嘅破壞，一次又一次嘅失望，浪費以前整個團隊嘅努力、心血，仲狠狠咁一刀一刀插落忠實粉絲，傷透大家嘅心，點解要咁樣？劇組咁樣對觀眾，好玩嗎？高興嗎？開心嗎？被玩弄嘅感覺係一·點·都·唔·好·受......縱然冇期望，但我仍然真心想睇到劇組有改善，放過龔水，放過觀眾，希望有日我能夠重拾追睇龔水故事嘅樂趣。
(重複多一次：請新/回組編劇落筆寫舊cp線之前做下功課，認真了解舊角色幾百集一路定落嚟嘅背景設定&所刻畫嘅性格；同埋請各編劇夾一夾，角色主線副線過場時，心情、性格、對白連貫一致啲，唔好變來變去。依套係長篇連續劇，忠實粉絲唔係善忘會有要求，連戲連貫性係好重要，你亂咁寫嘅話觀眾會睇到好陌生好出戲。)
我心目中嘅處境[喜]劇係以小品形式、輕鬆幽默嘅手法去探討家庭、職場(\學校)、社會、愛情etc. 林林總總嘅話題；間時溫情、間時搞笑、間時諷刺；題材豐富多元化、生活化，角色戀愛關係簡單唔會太過錯綜復雜，故事生動有趣，對白抵死搞笑，背後還帶出訊息令觀眾反思討論，就係從前會速遞開心嘅開心速遞故事。而唔係沉重、煩厭、無限輪迴，為咗炒起新角色嘅熱度、討論度， 不停寫啲踩界、「吸眼球」、博人鬧嘅劇情 (多角關係拖拉正劇式劇情，麻煩留翻係8:30, 9:30時段)。
開心速遞，一套曾令我著迷嘅處境劇，已經睇咗接近3年半了，差唔多每日都準時睇live捧場，不知不覺間對心愛嘅角色&故事線建立咗深厚嘅感情，所以要我放棄完全唔睇，我諗我做唔到。若然劇組覺得好多支持開心速遞多年嘅網民係唔同平台所提出嘅意見係多舊🐟、不思改進嘅話，咁我徹徹底底對劇組死心，做翻一個電視撈飯嘅觀眾，睇完就算了(sad😢)。我會睇，但唔再咁「傻仔」投入着緊劇情發展，睇開心速遞純粹係為咗欣賞同支持會用心演出嘅演員，係·咁·多。劇組逼到觀眾不斷降低要求究竟係咩一回事？！ 不過無論如何，我都會堅定支持我欣賞嘅演員演出！
好啦，寫到依度，我都覺得自己好折墮，又要睇又要嘈......其實，我都好想好想回到舊時般，可以開開心心咁睇8:00處境[喜]劇、開開心心咁睇龔水主線副線，但....唉......919集嘅劇情唔單止令人無奈，仲令到我好嬲，嬲到喊，好傷心好心酸......睇完Ep. 919 live之後嗰晚確實瞓得唔好，唉......咁投入咁辛苦咁折磨自己為·乜·呢？我都唔叉知，總知心·已·碎 😢......
【後記】
一路寫文，我一路嘆氣，嘆咗好多下。依篇感受文寫到好sad好灰咁，皆因我天生就唔係一個咁樂觀嘅人。我有嘗試過樂觀嫁，上兩個月我寫上一篇文嘅時候仲好仁慈，對劇組存有一絲希望。黑暗嘅4、5月過去後，欣賞完Ep. 904龔水副線 & Ep. 907龔水主線，我好天真咁講「hallelujah， 龔水重見光明啦！」，以為劇組回復狀態，肯放過龔水唔再亂咁嚟，俾翻有heart嘅編劇*好好創作真正屬於龔水兩個人嘅故事。怎料......少年我真係太天真了，我哋班觀眾錯·曬·啦......劇組919集再次好狠心咁將忠實粉絲由「明亮嘅天堂」掟翻落「黑暗嘅地獄」。有啲嘢唔係事候補鑊就可以當之前嘅事完全冇發生過。一個好深好深嘅傷口，就算日子耐咗傷口慢慢修復癒合 ，疤痕都永遠存在，永不磨滅嘅傷痛......So sad...but...true......
(*劇組仍存有有心嘅編劇，知道嘅，希望能夠欣賞多啲你哋筆下嘅龔水故事。有些編劇好久沒見，有點想念，你們還會回組嗎？)
無論係上一篇長文定今次依篇，我都盡量克制住自己唔好太激動，用詞溫和啲啲，哈哈哈哈哈！坦白講，作為一個忠實粉絲對於依段時間嘅劇情，問候式說話我話冇你都唔信啦。我個人真係極·之·唔·鍾·意，極·唔·想係8:00處境[喜]劇睇到8:30,9:30正劇式拖拖拉拉令人心煩嘅「疑似」三角/四角/n角關係嘅劇情，尤其係出現係我心愛嘅龔水線度😤。cp各自各自然發展，各自各有自己嘅戀愛故事，8:00合家歡時段劇情輕輕鬆鬆鄧梓峰，唔得嘅？？？
我，唔係特別鍾意寫嘢，但又唔知點解好抵死咁花時間寫咁多字，你估唔攰嫁咩😅...... 係咩驅使我去寫、寫得狠？係愛呀！真·心·愛！我唔想咁抑壓，唔想谷住度氣，於是搵個地方寫出嚟，當係宣洩自己內心傷感嘅情緒，抒發完，心情好一點，然後move on。粗口呢我就選擇留翻係心入面自己任爆，畢竟依度都係一個public platform嘛，嘻！
自我小提醒⏰：作為一個普通觀眾，觀點角度、喜好口味、解讀方式，人人都唔同。我可以有我嘅諗法，我有我鍾意；你亦可以有你嘅睇法，你有你鍾意，各自各表達，毋須刻意迎合附和/執着追撃爭拗，咁樣做人應該會輕鬆啲～開心啲～
「和諧唔係一百個人講同一說話，和諧係一百個人有一百句唔同說話之餘，而又互相尊重。」劇集《天與地》大結局裏面其中一句金句，其實都幾有道理呀！
若然你有由頭到尾睇完依篇超級長氣萬字長文，我衷心多謝你，非常多謝你嘅耐性。若果你想分享，我唔介意，歡迎ig (@just_follow.your.heart/ @_share._thoughts_) Direct Message 話我知，亦歡迎你去ig (@_share._thoughts_) 留言分享你嘅睇法、你嘅感受，謝謝大家！
*********************
2020.06.22 起筆，每日回想起什麼、有什麼感受，就記錄下來，放工回家寫少少寫少少，週末空閒一點就寫多少少，龜速進行。寫了14天，兩星期，2020.7.05，寫下寫下，就寫了二萬五千字。嗯，好久好久沒有寫過這麼多字，有點瘋狂的感覺😅，哈哈。不過，幾多字都好，不是重點，不是那麼重要。最重要是能隨內心所想去寫每一句、每一隻字。或許我一直有太多太多感受埋在心中，認真思考的時候就越寫越多，寫極也寫不完。寫文真的不是我的強項、不是我的興趣。要寫出富有渲染力的文字，我詞窮，肚裏沒什麼墨水，沒法做到。不過當我決定了要寫，認真起上來，全心全意，其實連我自己都嚇一跳呢🤣，而且真的很長氣😆，哈哈。終於寫完了，抒發完了，舒服了，累了。今次一口氣寫這麼多，寫得很慢，真的寫到很累。但完成一刻，發現原來自己都幾享受這個過程，用文字說感受，釋放壓力。這，是我落筆前沒想過的，的確是個很好的體驗。好了，收筆了，如·釋·重·負～
會不會再寫？不知。
隨心，隨緣。
