我從來都係一個安靜嘅觀眾，因為表達能力一般、唔擅長寫野，但就有睇有留意網民係唔同平台對於開心速遞劇情嘅分析、評論、見解。睇完see see tvb個條「若水x喜湘飛！你係龔燁揀邊個?」偏頗到不得了嘅短片真係有唔開心，令我不得不上水去留言，再係呢到講出嚟抒發下自己嘅感受，等自己個內心舒服一啲😇！
不過唔好意思，文筆唔好(可能有錯字、用詞唔準確、文法標點有啲亂、又中又英、又口語又書面語等)，如果講到一舊舊咁睇唔明，請見諒。
//有人會話，睇半個鐘處境劇啫，洗唔洗咁上心呀？//
大家會細心留意劇本對白、角色嘅背景性格、導演拍出嚟嘅畫面、演員嘅演繹、剪接配樂服裝道具嘅配合等等，然後睇完每集認真討論、分析劇情/故事發展嘅合理性，好簡單一個字 -「愛」。好睇嘅集數大家會讚賞，講吓個集自己欣賞嘅地方；唔好睇嘅集數大家會主動留言提出意見，表達吓點解覺得唔合理、睇到唔舒服/唔開心，希望劇組會留意。有心嘅觀眾係有讚有彈有理據，而唔會淨係「哇～今集有我嘅男神女神好靚仔好靚女呀，有樣睇我就鍾意嫁啦！」或者簡單幾隻字「好無聊唔好睇」。普通電視撈飯嘅觀眾的確可能嘻嘻哈哈睇完就算，who cares 點會咁上心呢？只有真心愛依套處境劇、睇咗幾年嘅忠實粉絲先會keep住花時間同精力去留意每個細節、緊張人設有冇崩壞、link翻以前嘅集數去分析故事發展方向係咪合乎邏輯/有冇問題等等，忠實粉絲係唔同平台每一粒字嘅留言、見解都係認真嫁，容許我講多次：係「愛」呀，劇組！
/點解會咁成功儲落一班忠實粉絲咁愛依套處境劇，會咁熱情支持各自喜愛嘅cp？/
咁我就講下我自己。
我係由第一集開始睇，以前嘅我確實係一個普通觀眾，只係有睇但唔會特別着緊劇情發展。直至蓮輝、龔水cp出現彈起，我先越嚟越投入。兩對cp初期嘅感情故事的確幾有特色，引人注目。
蓮輝之童話故事 — 大小姐係接龍集團保持霸氣嘅性格(女強人)vs係佢鍾意嘅送水輝面前卻展現溫柔、小鳥依人嘅一面(小女人)，亦因為送水輝嘅出現令大小姐得到從來冇嘗試過/擁有過嘅生活體驗。大小姐嘅演技加上依個對比，真係唔錯。可惜，自從大小姐出走去咗酒吧，有段時間嘅主線成日圍繞著錢又冇乜進展，我真係無法再投入佢哋嘅感情，對於現時蓮輝cp嘅故事我會睇但已經冇感覺(對唔著，我可能真係唔夠愛依對cp，所以唔係咁上心)。
龔水之歡喜冤家故事 — 雖然歡喜冤家依個設定係其他劇集都經常見到，但開心速遞嘅龔水俾我有唔同感覺，我好鍾意。編劇以前所寫嘅對白、導演所拍嘅畫面，加上演員嘅演繹、二人之間嘅默契互動(選角亦的確很好)，節奏明快、火花十足。龔燁以損人利己嘅死賤精形象出場；同熊若水相遇相處；龔燁熊若水一齊被困密室嗰晚，龔燁親身感受有情有義、衷心幫人嘅「熊若水本色」，因而感動、感到人間有情，放下戒心主動同熊若水講自己嘅身世、內心嘅不安、恐懼。熊若水點樣令龔燁知道呢個世界上有好人嘅存在，點樣幫龔燁解開屈係心裏面20幾年嘅心結，點樣幫龔燁釋放內心壓力放低仇恨；龔燁又點樣多次工作上係背後默默幫助衝動嘅熊若水，點樣帶領熊若水一齊解決職場公關危機等等，龔水嘅心路歷程、成長過程，好多粉絲都好有心曾剪過多條MV，我依度就唔多講，有興趣嘅去ig youtube search “龔水” 都會搵到一堆相關嘅短片。
整個劇組一直努力去建立龔水cp，引起迴響，吸納到咁多粉絲喜歡、真心支持(我承認我係其中一個)，唔係冇道理嫁。龔水粉絲確實係有唔少，我唔可以確定同證實，但我感覺到由學生、到在職人士、甚至媽媽級、上咗年紀、海外嘅都有。若然覺得龔水粉絲對於龔水劇情有睇法而留言好洗版好煩，倒不如換個角度諗下，點解龔水故事發展咗2年幾，到依一刻仍然會有咁多粉絲係唔同平台認真投入討論、堅持以行動力撐龔水cp? 係因為好多人真係好鍾意、好欣賞同好尊重劇組塑造嘅龔水角色，大家都唔想同唔捨得放棄，對劇組仍然有信心抱有希望，期望可以再次欣賞到高質素嘅龔水劇情，所以大家先會咁上心，大篇幅咁打觀後感同提出意見。
/有追看性嘅劇情/
無論係蓮輝一系列嘅「初戀套餐」，或者龔水由「心戰」「報仇記」、「燁來越愛你」到回水後嘅「水的燁緣」、「龔燁的秘密國度」、「初雪的約定」、「龔燁的No. 1」、「龔燁復仇記」、「白色情人節」，都睇得出兩對cp嘅感情故事係有認真用心鋪排。唔同主線嘅內容係有連繫，主線集數之間嘅副線/過場 - 角色嘅心情、性格、對白係連貫嘅，再者cp主線副線過場集數嘅安排亦妥當。
以前真係拍到有正劇感覺、有追看性之如，故事亦保留翻處境劇嘅味道 - 情節唔係一般平常嘅套路，係獨特嘅，會有觀眾意想不到嘅劇情，但同時平衡得好好，唔會太過踩界/過咗火位*令觀眾難以接受。That’s why 吸引到我去留意，並且非常期待cp感情發展。
(*833「愚人愚人！」扮失憶同扮小產我認為係over咗，尤其係扮小產，有其他網民提到依樣野其實會對女性觀眾有hard feeling，唔係可以隨便攞嚟講笑，我認同。要玩唔應承、求唔成婚有千千萬萬種較合理令人接受嘅理由，為咗加強戲劇效果所以要去到咁盡？係咪真係有必要呢？)
另外，大家都感受到最近嘅劇情有參考經典/有迴響嘅劇集，並加入相關元素落劇情。以前嘅集數都有依種做法，我覺得融入得好好，唔會太突兀。以龔水266「心戰」為例 。龔燁、熊若水被困密室一整晚，去到結尾龔燁身體發冷、開始冇氣力，去到生死邊緣。龔燁同熊若水講如果佢死咗，而熊若水想保命嘅話，可以學某套電視劇咁食咗佢，因為個套劇嘅男主角(哈，正正就係飾演龔燁嘅演員)俾人食咗之後就救翻幾個朋友條命。然後龔燁問熊若水記唔記得個套劇嘅男主角，熊若水回答：「係咪家明呀？」跟著龔燁暈倒(或者其實係突然瞓着🤣)，熊若水大嗌一聲：「家明！」之後片尾曲起歌 - 「如果，命運能選擇…」(正劇「天與地」片尾曲 「年少無知」) 。成個flow好流暢，我仲記得當時睇live完全牽動到我，各方面嘅配合、播出嚟嘅效果扣人心弦，好精彩好正！266「心戰」同277「報仇記」係我最鍾意嘅龔水線集數(睇咗好多次)，誠意推介🙌🏻。 除此之外，671「龔燁不壞·若水不愛」，係根叔ff小劇場裏面加入經典劇集「義不容情」情節，從而呈現龔燁(丁有燁)係根叔心目中蠱惑嘅形象，表達方式同效果的確好有趣！
//有人可能覺得依家加咗個前度角色俾龔水線咪有翻劇情lol，有暗湧、有衝擊性先有戲睇嫁嘛，幾有正劇feel！//
對唔著，我唔認同。我個人真係唔想喺依套處境劇見到正劇經常見到嘅套路，如果係咁我倒不如去睇830、930正劇，岩唔岩？坦白講，我的而且確唔鍾意睇藕斷絲連嘅三角關係(正劇差唔多套套都有🙃)。
龔水may表面話唔會爭仔唔係三角戀，但實情我睇完859「Robert, May, Mary」 live (尤其係尾段+ end shoot)，俾我嘅感覺係...... 別有用心去營造唔清唔楚嘅三角關係......
點解咁講？
一對已認定對方、去到談婚論嫁嘅情侶，但為咗阿爸嘅病情然後要揾前度扮女朋友，都算講得通，而且熊若水係善良，會明白龔燁嘅難處。但龔燁同may搞掂完阿爸之後，[1] 龔燁竟然飛起mary，同may單獨食晚餐，俾機會龔may兩個人單獨相處😳(唔好唔記得may其實對龔燁餘情未了嫁)。其實龔燁想多謝may陪阿爸，請佢食飯唔係唔得，叫埋mary一齊食、一齊多謝may幫阿爸，會唔會好啲呢？我相信mary同may係唔介意同枱食飯嘅，有咩「過去回憶」三個人齊齊傾、齊齊開心share，冇誤會又唔傷感情，係咪先！(我自行ff: 或者可能龔燁驚mary見到may戴著隻求婚戒指會hurt到mary......不過我就覺得一早俾mary知發生過「阿爸強行may戴戒指事件」，應該會好過mary之後發現又嚟誤會......) [2] 去到尾段龔燁主動同may跳舞😳，雖然龔燁原意係要試探may，但點解龔燁知道may講大話之後仍繼續一齊跳舞，編劇仲較岩時間要俾mary見到龔may跳舞？即使有人可能覺得龔燁出於好心，所以繼續跳舞都冇乜問題，但龔燁係知道may嘅出現會令mary不安嫁！若果龔燁對may冇嘢但在公在私要單獨同may見面，同時又唔想mary擔心諗多咗嘅話，龔燁見may之前(esp.唔係因公事)事先同mary講聲等佢安心，可以嗎？真係有必要次次俾mary唔覺意見到龔may一齊，然後mary心裏不安、龔燁事後先解釋？容許我再提提大家，may唔係龔燁嘅普通同事/朋友咁簡單(唔係579 賈名媛嗰種工作partner)，may係龔燁嘅初戀前度(仲要突然俾龔爸認定咗係新抱仔)，重點係may有初戀情意結，may話佢嘅口味冇變過而且之前亦同mary表示對初戀男友(龔燁)餘情未了，ok？縱然神女(may)有心，襄王(龔燁)無夢，我個人覺得龔燁係859集後半段同may一齊嘅行為其實幾踩界......過分嘅關心係有機會唔覺意俾錯signal對方嫁......作為一個有女朋友、會珍惜同好錫熊若水嘅好男人(龔燁)，我覺得適當嘅避忌係需要嫁！若果龔燁真心想幫may解心結，搵埋mary拍住上一齊幫may拆結(拆彈)會唔會好睇啲？仲可以俾mary發揮到佢有情有義、熱衷幫人嘅「熊若水本色」添，係咪？(就好似以前mary幫龔燁解心結咁～)
就着以上兩點，唉，我的確覺得搵戲做，特登整造誤會令三個人有心事、矛盾、衝突、委屈、唔信任......
(然後令觀眾睇到激動、激心)
(真係咁岩打到依度就俾我見到869「誰願放手」下週龔水may線劇情預告...... 「若水及後發現龔燁與May單獨見面，而且舉動親暱，遂向二人大興問罪。May尷尬離去，龔燁竭力解釋一切。若水擔心龔燁會因不獲信任而提出分手，遂設法補救......」Em......唔知我係咪估中咗？似乎劇組係有心整造無數誤會俾龔水may......就算劇情最後反cup冇事又如何呢？龔May「單獨見面」、「舉動親暱」嘅畫面，營造到龔燁疑似出軌嘅感覺，真係好睇嗎？我覺得咁只會令到龔燁、熊若水原本角色嘅魅力大大減低，普通觀眾可能會覺得龔燁唔專一；Mary未搞清楚件事就無理取鬧，完全唔通情達理；而我心裏面就會有條刺......明明幾百集以嚟嘅鋪陳，多次展現龔燁係個口賤但專一嘅男人......之前編劇寫「我嘅女人只會得妳(熊若水)一個」[605 有食唔食 (下)、「我最鍾意嗰個係妳(熊若水)」[708 誰中途轉gay了]、「我心入面由始至終得妳(熊若水)一個」[775 弊傢伙，玩大咗]等等金句俾龔燁，但前度may出現幾集之後，龔燁之前所講嘅承諾可能會轉間變成廢話？若果真係咁嘅話，我會覺得好可悲......不過以上只係我睇完文字預告嘅估計同觀感，真實情況同感覺的確要睇完live先知道同確定到，以免未審先判。）
或許有人會鍾意以上正劇式三角關係，仲覺得好鬼正，睇得好肉緊、好緊張添！不過我呢就非 常 之 抗 拒 依種1516、拖拖拉拉三人行。因為前度突然出現，令熱戀情侶嘅行蹤收收埋埋、你瞞我瞞、呃來呃去，加上集數安排令成件事非常之「拖」，拖泥帶水。對於追咗幾年嘅忠實粉絲嚟講，龔水may線峰迴路轉得嚟毫無吸引力，真係睇到好心煩...... 我真係極之唔想好地地一對熱戀正常情侶，突然加個第三者落去擾亂佢哋嘅感情(嗱，我冇話may係嚟爭仔搶龔燁嫁，只係想講may嘅出現令到龔水無端端多咗好多[可以係不必要]嘅誤會)......好地地唔得嘅......都係個句，若果想睇正劇式三角關係情節嘅話，我倒不如去睇正劇，點解要睇處境劇呢？仲要係名為「開心速遞」嘅處境劇？請分清楚正劇同處境[喜]劇嘅分別，可以嗎？
更令人痛心係see see tvb條短片火上加油，不斷踐踏熊若水呢個角色(雖然佢唔完美但其實有好多優點嫁)，放大佢嘅港女形象之如仲完全唔提佢真實嘅優點(心地善良、孝順、好照顧老人家 [208 燁來越愛你(下)、704 龔家好新抱etc.]、夠真、有情有義、唔計較真心幫朋友/同事/陌生人 [261 唔係我呀!、266 心戰、541 活得自在etc.] 、會悉心幫龔燁打理家頭細務 [818 女戰士之心結、825 失落了的事業心、845 緣份有盡時etc.]等等)。反之前度may就有好多優點、完全冇缺點，話may每日都小鳥依人又貼地......總之see see tvb就要幫手塑造到may嘅形象好過mary十萬倍啦，然後叫大家代入龔燁應該揀mary定前度may? 係咪當觀眾傻架？幾百集以嚟Mary嘅「熊若水本色」點樣感化龔燁，幫龔燁解心結、走出陰霾，see see tvb你又唔講？May只係出現咗2集多少少，請問各位觀眾對於may依個角色嘅認識、了解有幾深？龔燁係859集都悉穿咗may有講大話，may真係單純一個好人？佢真係咁簡單？現時大家仲未可以確定到！(而我就唔太信喇，我估may嘅「好」可能只係表面，如果may真係咁簡單就冇咗劇組想要嘅戲味嫁啦，岩唔岩先🙂？)
關於人設問題，好多網民都有提及過。係以前嘅劇情裏面，我睇到開心速遞嘅人物係多面(例如大小姐表面係女強人，但內裏可以好小鳥依人)、角色係有優點亦有缺點，充滿立體感。可惜，劇組依家成日將好多角色嘅缺點放大，忽略咗角色嘅優點，人物設定亦唔連貫一致。我唔講其他角色，淨係用熊若水做例子。[1] 明明266「心戰」塑造到熊若水係個「迎難而上嘅職場三文魚」，下屬做嘢幾咁求其 - 做錯、做遲、做漏都好，熊若水都唔會計較，自己硬食捱夜通頂做曬啲嘢，係個心胸廣闊、會負責任嘅副總監。但去到669「只想你包庇」，熊若水竟然為咗整生日蛋糕俾男朋友就唔理工作，寧願花所有時間精力去整蛋糕而唔去做proposal，照抄舊年嗰份得過且過就算，仲怪責龔燁喺開會嘅時候見到自己女朋友俾老闆話都唔出聲撐，刻劃到熊若水毫無責任心、公私不分。呢集嘅熊若水好陌生，難道一拍咗拖就會突然冇曬事業心、斤斤計較(明明今次係熊若水自己失手冇做好本份)、完全失去理智？熊若水一集之間變成咁，唔太合理吧......按之前嘅鋪陳，我心目中嘅熊若水係個專業、會負責任、會係下屬面前做好榜樣嘅副總監，唔係咩？ [2] 明明喺579「霸道總裁與大方女友」，熊若水展現到係個大方、明白事理嘅女朋友，知道龔燁有工作在身(仲要係同女性[賈名媛]進行拍攝工作)都唔選擇係片場監場，亦都冇不停check住男朋友，只係默默地喺餐廳等男朋友收工。但點解去到813「熊不甩」，熊若水親眼見到龔燁煩緊公事都仲不斷痴住、chur住男朋友？喺龔燁office，熊若水應承會靜靜地陪龔燁，但轉頭睇手機見到得意嘢就大聲笑之如仲叫龔燁睇吓，令到男朋友唔能夠專注工作？龔燁知道熊若水同好姊妹鬧咗交，主動幫手令熊若水同好姊妹和好，但熊若水反而怪責龔燁多事，然後嬲咗男朋友？龔燁主動去女朋友屋企想氹佢講和，男朋友係門口企咗半個鐘，但熊若水竟然企到好硬唔肯開門，完全唔俾機會大家坐低傾下？總總行為、對白，刻劃到熊若水好小氣、好難服侍。呢集嘅熊若水再次非常陌生，熊若水嘅大方、明白事理、會俾男朋友私人空間、易氹(請參見579集)嘅性格又去咗邊？ 以上例子可見人設冇咗連貫性，係咪？
喺近依9個月嚟，熊若水嘅人設(特別係龔水主線)似乎有啲飄忽，近排亦過分放大佢嘅港女性格......(以我嘅見解，熊若水係個非一般嘅港女，唔膚淺，係個有內涵、善解人意嘅女人，又識打理家頭細務，佢只係有時會衝動咗少少同鍾意channel包包啫......)究竟係咩原因(特別係see see tvb嗰條偏頗短片😤)要咁樣對待熊若水依個出現咗800幾集嘅主要角色呢？我真係摸不着頭腦......
當初我咁鍾意龔水線除咗演員有火花之外，故事內容亦冇乜雜質，故事發展嘅節奏亦掌握得好。我想睇「有追看性」嘅cp故事絕對唔係現時依種 [我覺得係老土、有時過於戲劇化/唔太合理] 嘅830、930正劇劇情，我想睇嘅係「拍 到 有 正 劇 感 覺 但 同 時 故 事 保 留 翻 處 境 劇 嘅 味 道」(就係以前龔水故事嘅效果呀！)。我想好似以前咁追睇帶有開心速遞特色嘅cp感情故事，會令我日後翻loop，再三回味！而唔希望係加啲平常無奇或者無厘頭、奇奇怪怪嘅正劇劇情落去處境劇cp感情線度，然後懶有正劇feel。容許我講多次 - 請分清楚正劇同處境[喜]劇嘅分別，可以嗎？總之，現時龔水故事嘅劇情走向(我覺得係暴走)唔係我嘅口味，真心唔希望再咁樣持續落去。(不過劇組已經寫好咗拍好咗喇，各位[唔鍾意睇正劇式三角關係]嘅觀眾唯有忍下啦！龔水粉絲要繼續撐落去呀！)
/咁cp故事要點樣先岩我口味呢？/
個人認為cp感情主線甜唔甜、虐唔虐*只係表面，故事內容嘅深度更為重要 - 點樣帶出以及豐富角色嘅背景；點樣刻劃唔同角色嘅性格、處事方式對比、價值觀不同；經過一段時間嘅相處，脾性、待人之處會唔會受對方影響而有轉變、成長等等。(我幾鍾意541「活得自在」，透過人物角色(龔水豹叔)嘅行為，帶出每個人待人處事嘅態度都唔同，大家覺得點先至為活得自在呢？依集看似平淡卻生活化、充滿思考性，我認為係高質素！我係想要依種處境劇式嘅效果！)
*其實甜定虐都冇乜問題，只要合情合理，理性嘅觀眾係會明白接受。龔水454「初雪的約定」虐得嚟我個人幾鍾意，亦好欣賞劇組花心思去呈現初雪嘅畫面，處境劇係有限資源之下都能夠拍到咁靚咁有feel，在此真係不得不讚。
對於已經成熟嘅cp，我覺得故事發展應該係好好深化角色(大前提應該要跟據翻之前幾百集一路定落嚟角色嘅背景設定&所刻畫嘅人物性格 - 依套係處境劇，忠實粉絲唔係善忘、會有要求，連戲連貫性的確好重要，唔係嘅話我哋會睇到好亂好陌生好出戲)，以及點樣共同經歷唔同[合理嘅]事件（唔係加前度去考驗)，從而了解對方，令感情昇華更進一步。普通情侶日常生活磨合、職場上嘅合作，都可以帶出唔同問題(大前提係唔會為咗引發衝突而改寫是但一方嘅人設)，從而引發觀眾反思、討論。可能劇組覺得依啲嘢比較悶冇戲味，但作為一套處境[喜]劇，其實可以花啲心思、加啲創意，用輕鬆幽默嘅方式去表達。(745「愛我請計劃」，龔水vs洋洋俊華拍拖處事方式嘅對比，我都幾鍾意。) 又或者唔同cp crossover嚟個double dating做對比，個人想睇潮善龔水！
我唔希望係好似近排咁，為咗增加劇情張力、話題性、刺激性、熱度，不停誤會、誤會又誤會，委屈、委屈又委屈，無理取鬧無限loop，其實都幾煩厭。又或者[好似859]加新線新角色[談過去]，但就出現一啲令忠實粉絲睇到一頭霧水、睇唔明嘅情節。有啲位若果之後嘅集數冇再提、冇解釋到、冇兜翻，完全不了了之好似冇咗件事*，咁樣我會認為係唔合理。真心唔希望粉絲成日見到有懷疑、睇唔明嘅情節時要自行解讀、自己ff補回劇情、自己係度兜但又唔知編劇係咪咁諗咁睇......明白處境劇每集嘅時間有限，但有時有啲位係需要清楚交代，唔交代嘅話其實係會影響觀眾(尤其係忠實粉絲)對條故事線嘅觀感。依個係編審編劇嘅工作、責任，是嗎？
(*例如833集求婚時龔水兩個玩大咗，跟著845集和好前後兩位都冇按愚人節所發生嘅事好好傾談，究竟龔水各自心中有冇依條刺？真係一個「謎」🧐。我唔知編劇日後會唔會提及，但依一刻俾我嘅感覺係linkage做得唔夠完善。)
[題外話 - 加新線：廢柴同盟嘅突然出現令好多網民包括我睇到黑人問號，好似為成立而成立，我feel唔到成立同存在嘅意義，亦都唔覺得好搞笑......]
普通觀眾當然唔會察覺有問題，最多咪覺得好悶、無聊，唔好睇咪唔睇lol。但對於追咗條cp線幾年、認真睇劇又上心嘅忠實粉絲嚟講，一次又一次見到近排嘅劇情好似不斷摧毀緊自己心愛嘅角色，的確會唔開心好心痛。本來好多網民包括我覺得may嘅出現可以豐富翻龔燁嘅歷史背景。可惜，有好多網民(忠實粉絲)發現859集提到嘅龔may過去，時間上似乎有錯亂，同之前267「報仇記」、415「龔燁的秘密國度」嘅鋪陳唔太吻合......而現時劇情走向又似乎偏向正劇式三角關係為主......似乎會係誤會又誤會...... 因為may嘅出現...幾百集以來所鋪排嘅龔水精彩故事，以及龔燁+熊若水嘅角色形象亦有機會被毀...... 參考其他網民嘅講法 - 只係一個月、幾集之間，就可能會推翻曬之前龔水cp 600幾集以嚟嘅鋪陳，你話喇，心唔心痛，值唔值得？
/綜合以上所提到嘅問題/
我自己覺得現時龔水cp故事係：
變咗質
失去以前嘅味道
有點公式化
欠缺獨特性
欠缺連貫性
欠缺完整性
欠缺細緻度
欠缺緊湊度
有時......
還欠缺合理邏輯性
(龔水嘅黑洞事件真係夠曬詭異「驚」典)
現時嘅龔水故事再冇好似以前咁牽動我嘅心，更多嘅只有激心同傷心......
長氣重複多一次：龔水粉絲咁上心，係因為大家真係好鍾意、好欣賞、好尊重龔燁同熊若水呢兩個角色呀！
當然，龔水833, 845, 848, 859 集都有一啲可取之處嘅，唔可以完全否定曬劇組嘅努力。833嘅ff +真實求婚實景、ff龔水結婚行禮畫面；833同845嘅龔燁apartment回憶+ 833 最尾嘅鏡頭運用；848 初戀cafe嘅長腳蟹；859 嘅灰姑娘、公主、王子、巫婆ff小劇場等，都見到劇組嘅用心。呢幾集裏面某啲對白我都幾鍾意，幾有印象。
原諒我以上所提及嘅都係圍繞着龔水線，因為係龔水故事令我睇得咁投入、咁上心。不過，我唔係一個想睇龔水先睇開心速遞嘅觀眾，到依家我仍然幾乎每日都捧場，真係差唔多每日8點鐘準時睇開心速遞live (話說我依家淨係會睇開心速遞，冇睇830、930正劇好耐)。除咗龔水，我亦鍾意睇開心速遞唔同大大小小嘅角色、唔同線、唔同角色配搭，例如安仔、大家姐x安仔、熊家三姊妹、熊家女婿、潮善、大家姐x大小姐、接龍職場故事/群戲(花生3友、風流4子、IT 3子、群姐等)、龍家大小姐、KC x Icy、KC x Terry 、Jenny、大學故事/群戲、George x 阿孝、曹總、譚道德、小學生Philip技安......當然仲有龔家兩父子！即使以上仲有好多條線同配搭我冇提到，但我都有睇嫁！睇到搞笑嘅情節&畫面、聽到搞笑嘅對白，我都會跟著大聲笑😆！連我屋企人都問我使唔使笑得咁大聲咁開心🤣！(Btw安仔同花生3友真係好有喜感!!!)
開心速遞依個劇名的確唔錯，我亦都好鍾意「一家人」一齊唱嘅片頭主題曲。1000集、1100集、1200集......有幾多集都好，相信依家仍然有好多觀眾係有睇開心速遞嘅。知道依家一個星期做足7集整個劇組要趕進度的確唔容易，只希望劇組冇忘記初心，會認真去對待每一個自己塑造嘅角色(連貫翻人設，同埋每個人係有優點同缺點嫁，唔好只係放大缺點) 同所有cp嘅感情發展，唔希望令到支持咗幾年嘅開心速遞忠實粉絲一次又一次失望。記著依套係處境[喜]劇(唔係830、930正劇)，想增加話題性可以考慮寫啲貼地合理有共鳴嘅劇情+構思新鮮有趣嘅題材(唔係830、930正劇平常套路)，同時拎個平衡唔會過份誇張太過火，最重要係保持翻開心速遞嘅特色，唔希望浪費以前整個劇組嘅努力、幾年嚟所建立嘅形象，百花齊放真真正正速遞翻啲開心俾觀眾，俾忠實粉絲有個美好嘅印象、回憶！感謝！
(後記：普通人一個，冇寫開文、從來冇係討論區留comment評論劇情、唔識亦從來冇試過出post寫劇評/觀後感，今次打八千幾字長文對於我嚟講的確係個幾大嘅挑戰，真係寫到幾攰下😅，始終寫文唔係我嘅強項、唔係我嘅興趣，哈。真心係第一次[亦可能係唯一一次😂]，所以未必表達得好清楚、唔係寫得好到位。純粹係開心速遞小粉絲嘅個人睇法同真實感受，大概係因為真心「愛」，尤其係愛龔水線，所以先激發我花時間、心機去打咁多字。其實係唔同平台都有好多網民仍然好有心睇完每集之後對劇情作出討論、分析，佢哋有提出過好多好意見，有point有條理。當然大家都有自己嘅睇法，有自己鍾意同支持嘅角色/cp，會特別着緊自己心愛嘅角色/cp，所以粉絲先會咁熱情係唔同平台留言/出post發表意見，希望劇組留意。而我打依篇文嘅目的唔係期望會有咩人睇到，主要想搵個地方講出心中所想、內心嘅感受，抒發完心情都輕鬆翻啲😌)
若果你有由頭到尾睇完依篇超長氣文章，我衷心多謝你，多謝你嘅耐性。我唔介意你轉發 (若然打算轉發嘅話請註明出處 [ig @_share.thoughts_]，感謝🙏🏻)，亦歡迎你留言分享你嘅睇法、你嘅感受。