記住係外賣員唔係外賣仔喔!! | EP960 外賣「燁」之苦 · 有何感想？
👋🏻，又係我依個普通觀眾分享感受😆。
註：純粹想用文字記錄心中所想，冇寫文嘅習慣，若然有啲位寫得唔好、用詞唔岩、表達得唔清楚嘅話，事先講聲唔好意思，請見諒！
EP960 外賣「燁」之苦 (龔主線、龔水小副線😊) | 2020.08.07
上一篇文提過好耐冇見職場龔(看下圖😛)，想念醒目過人嘅拆彈龔，一直心念念好想睇真真正正嘅職場線，估唔到一個月後就有，終·於·都·等·到·啦 (感動🙌🏻)！仲要係久違嘅龔生職場個人主線！！！
（2020.07.05）
老實講睇完 EP960 文字預告已經滿心期待，8月頭見自己未係好忙抽到啲時間，一於畫下畫，試下整預告post。難得有龔生職場個人線，當然要支持支持 (大大力)！
期待已久嘅龔生職場個人主線，果然冇令觀眾失望。當日睇完live，第一個反應係：「多謝你，許編劇🙇🏻♀️！」。6月14日許編劇寫嘅 EP907「老土萬歲」，我都好鍾意，係近期難得一見有質素嘅龔水主線，所以上一篇文我用咗好大篇幅去講 EP907 感想（之前未睇過而有興趣嘅，歡迎你去睇 2020.07.05 post 嘅感受長文)。EP960同EP907一樣，題材生活化，貼地寫實，係我心目中嘅處境[喜]劇好作品。許編劇兩次都巧妙咁透過開心速遞唔同角色嘅互動，多角度帶出唔同訊息，引發觀眾反思、討論，的確係有意義、有思考性。
咁我睇到啲咩，有咩諗法，點解咁鍾意依集呢？等我由頭到尾逐一講一講啦😉。
【你對外賣員的印象是......】
係未播EP960之前，唔知大家對外賣員嘅印象係點樣呢？
提起外賣員，我第一時間係諗起有個阿叔踩住部生銹單車，車尾有個籃裝著好多盒茶餐廳外賣飯盒(就好似下圖咁)😆。
（圖片來源：bastillepost）
再諗，腦海就浮現南亞裔人士揸著電單車送外賣🤣......嗯，我諗我嘅思想應該仲停留係遠久年代......哈哈哈😂。坦白講，我係一個坐office嘅打工小薯仔，平日就係返office ▶️ 朝9晚5腦力工作 ▶️ 放工，大部分時間stay indoor，真係比較少留意外面嘅世界，亦唔了解外賣行業。我知近幾年好流行🐼app個類嘅外賣速遞，外賣員可以係任何自僱人士，以行路/踩單車/揸電單車/揸私家車嘅方式送外賣。但其實我從來都冇用過🐼個類外賣app叫外賣，對於外賣app嘅實際運作、顧客叫外賣時會遇到嘅問題、外賣員嘅賺錢方式、外賣員經常遇到嘅難處、現實中大多數外賣員速遞食物嘅方式等等係點樣，我唔係咁清楚。
所以EP960，由「外賣『燁』體驗過嘅辛苦」去呈現「外賣業人士會遇到嘅苦況」，依個題材對我嚟講幾新鮮吓～
【龔潮對外賣員的印象是......】
@熊家
一開波就有兩位熊家女婿 - 龔生x潮生着住「情侶」裝🤣，明讚暗串鬥住氣一齊出場，正啊喂！兩位每次一講⚽️一提到各自嘅愛隊，就忍唔住小學🐣mode鬥嘴😂 (參考EP633 「女婿是人家的好」)。哇，龔生講「海鮮波」個時嘅零距離接觸加埋潮生嘅瞇瞇眼神，真係😊 hehehehehe。
今次兩位好女婿醒咗，好乖咁買新鮮餸菜上熊家痴餐👍🏻，冇再送生果(參考EP950 「餐餐有熊家」)。可惜個爐壞咗，熊家寶寶冇得享受海鮮、A5和牛大餐，只能夠食外賣餐。外賣故事就由依一刻正式開始。
明明上一刻，龔潮仲鬥緊嘴，但一提到用APP嗌外賣就即刻勁齊心，對外賣員一副「睇唔起、信唔過」嘅樣，主動幫熊家人仔細咁check外賣。兩位女婿咁緊張，原來大家都曾經係外賣app嘅用家，同樣遇過唔好嘅服務體驗令佢地反感，對外賣員留下負面嘅印象，一個字：「低質」。
龔潮(曹)嘅極差體驗，正正以顧客嘅角度，好明確咁帶出3個用外賣app叫外賣可能會遇上嘅問題：
1️⃣ 遲大到，餓到發癲就嚟餓到唔餓都未送到嚟，仲有機會”被取消“咗order都唔知添……
2️⃣ 明明係男外賣員接單，但turn out換咗另一個女外賣員送 (i.e. 唔係app裏面個個人)……
3️⃣ 送到過嚟，個飯盒甩皮甩骨、溶溶爛爛，好似打完仗咁，見到都唔開胃……
[潮生仲加送一個都市傳說👉🏻傳說中嘅加料凍檸茶😏]
即使安仔話佢同佢同學仔送外賣嘅時候唔會咁樣，但因為無監管，難以確保服務質素，所以係龔潮心目中，普遍外賣員都係態度差、求其唔認真、無責任心。
龔：好嘅唔會多 😐！
潮：(和應) 絕對同意 👊🏻！
[龔潮其實都好重cp感，睇完熊家女婿外賣論依場戲，見到佢地嘅互動，播完第二朝我忍唔住整咗以下幅圖🤣。乜你唔覺得龔潮一時互串一時又好岩key，好似打情罵悄咁好有愛㗎咩😗?]
【接龍新老細對龔的第一印象是......】
@接龍會議室
鏡頭一轉，職場龔出場啦！接龍最出名嘅橋王😎，龔生是也😉。新老細雷公果然有眼光👍🏻，委任拆彈專員龔生，搞搞長期負評嘅「踩」地雷外賣app。無問題，龔生咁叻仔一定拆得點，一定做得好好睇睇㗎！
【 職場孖寶Marketing精英 - 龔水】
@龔生 Marketing Office
有龔當然有水啦。雖然今次老細冇叫水水幫手，但雷公首次考驗龔生，「考牌」喎，水水作為前市場部精英、龔嘅未婚妻，幾忙都好都會抽時間幫幫手、俾下意見、support老龔仔嘅💪🏻。好開心編劇寫媽呢空有參與過程，等觀眾可以睇到職場龔水小過場😀。以前比較多係龔生傍住媽呢空，默默咁引導媽呢空幫佢解決工作上嘅難題，又或者龔水一齊被委任聯手拆彈，的確較少寫媽呢空做龔背後嘅小助手協助龔生處理project，我印象中今次算係第一次吧？(各位龔水粉絲，若然有錯就話我知啦!!）
龔水好認真咁研究點解係「踩地雷」，發現絕大部分顧客都係負評班外賣仔，於是決定搵佢地傾下計，由外賣員嘅角度了解下實況。
【外賣員的角度是......】
@接龍會議室
原來安仔所講嘅同學仔就係現任電影學會三子～ 島大學生 x 龔生依個配搭又幾得意😄！依家外賣app咁hit，外賣員返工時間彈性大，相信現實的確多咗後生仔入行，兼職做步兵賺下錢。
龔生一問三子有咩睇法，三子就一肚氣勁激動，嚇到龔水😦⁉️ (尤其係水水哈哈😆)，龔生再順勢問有咩改善建議可以提升服務質素。
三子指出：
👉🏻 工資計算唔公平
👉🏻 所以加薪加福利就最實際
意見交流嘛，聽完三子嘅初步意見，輪到龔生拎翻個主場講下公司嘅睇法！
龔生作為公司嘅代表，當然會以公司利益為大前提。「以客為先」、「顧客永遠是對的」嘅管理理念喺服務業大行其道，所以龔生朝住依個方向，早有準備[單向]根據顧客嘅意見訂立一系列嘅規矩，要求所有外賣員都一定要提供合格、達到專業水平嘅速遞服務，否則扣·錢/無·錢·收。當時嘅龔生覺得只要用強硬嘅手法迫大家，大家就會生生性性，從而可以確保到服務水準。
龔生所建議嘅規矩主要包括：
1️⃣ 要係指定時間內完成送餐，唔係就扣錢
2️⃣ 運送途中如果食物有損壞，不收費重送
本身三子對公司已經好不滿，見到龔生份約章就更加無眼睇，提出兩個唔合理嘅理由：
1️⃣ 外面嘅世界係有好多不穩定因素，有時遲咗送餐係有原因嘅
2️⃣ 客未必會諒解外賣員，有事無事都投訴一餐俾負評，令到外賣員少咗單接、少咗收入
面對班「無知」嘅𡃁仔，龔生要keep住個勢 (留意龔生叉手一副冷酷樣) ，反駁講下職場道理。
龔生：「有邊個員工唔想人工高、福利好？(水水認同龔生，微微搖下頭) 送外賣咋喎就月入三萬，咁都唔知足呀？」
係龔生眼中，做外賣員送下嘢者，又唔洗用腦度橋，啲錢好容易就賺到，再加上龔生一早先入為主對外賣員無好感，所以當刻理解唔到𡃁仔嘅諗法都好正常，點解班𡃁仔要求多多㗎？
「你唔係外賣仔，憑咩否定我地呀😠。有本事嘅話，你賺三萬蚊俾我哋睇呀！」面油極速火滾，拍曬枱大膽直接向龔生挑機。
(三子輪流激動拍枱，水水又嚇親啦🤣。同EP 907嘅阿千阿熹一樣，後生仔果然直腸直肚有guts😼。一開始我同水水一樣嚇咗一嚇，後生仔對住大公司高層拍曬枱咁，好似有少少無禮貌嘅感覺......🤔）
職場上係冇龔總監解決唔到嘅事，俾班後生仔大翻轉頭，自信十足好勝嘅龔生當然甘願接受挑戰，誓要證明自己嘅諗法係無錯，令班𡃁仔心·服·口·服。龔生果然係認真派，決意做一個禮拜，唔係好兒戲咁試做一日做下show就算，Good!
【龔生賽前打氣團🎊】
@新威龍廣場
重頭戲嚟啦！平日西裝骨骨嘅龔生搖身一變地雷外賣員制服look，嗯，有顏值嘅龔生，依然係咁靚仔😉。龔生處男下海第一日出征，點少得媽呢空現身為老龔仔打打氣呢～ 媽呢空知道做外賣員好辛苦，唔係想像中咁容易，有啲擔心龔，於是主動上前用溫柔嘅聲線、雙手輕輕摸腰關心龔生。
我係上一篇文有提過情侶間一個好簡單嘅親密小動作，已經可以令對方開心，係生活小情趣。以往比較多見龔生無意間摸摸頭、摸摸面、拖拖手氹水，今次到水寵龔，感覺係另一種甜呢😋，好暖心。(對於水嘅主動，印象比較深刻嘅係EP633 「女婿是人家的好」，水主動攬實龔，鼓勵佢俾心機要贏潮生😊)。
龔生見媽呢空咁關心自己，握實媽呢空雙手，充滿信心咁回應fiancée：「放心啦，無問題😚！」
其實龔生嘅人生經歷過高高低低，年少時家道中落要打至少4份兼職工努力搵錢過活(參考EP415「龔燁的秘密國度」)，又要獨力照顧好無定向嘅阿爸，一直以嚟生活都唔容易過，依家只係少少苦捱得過嘅～ 依個連戲位的確幾細心，合理咁豐富翻龔生嘅背景，原來少年龔都曾經做過外賣員㗎！
除咗媽呢空，仲有龔生真·好兄弟接龍🥜三友嘅大力支持💪🏻。🥜三友每次出場都好搞鬼，佢地設計嘅一致動作真係好好笑，充滿喜劇感，我每次都忍唔住笑出聲😆‼️
抱住專業精神嘅龔生當然準備妥當，見到八千公老闆娘冇好好咁包好有湯汁嘅食物，即刻示範要點樣做好啲。龔生係fiancée同兄弟面前一股強勢，兄弟們都忍唔住要俾個like👍🏻！
兄弟讚完之後，媽呢空就接住用仰慕嘅眼神、帶點嬌嗲嘅聲線再讚一讚，「好嘢呀😍，龔燁！」，加埋媽呢空臨走前甜美嘅 goodbye smile，龔生充滿能量啦🔋！
島大三子咁岩去開新威龍廣場，遇到第一日做外賣員嘅龔生，當然冇俾龔生嘅氣勢嚇親啦～ 亦都無視龔生為敵人，因為佢地深知道外面殘酷嘅世界先係外賣員最大嘅敵人，要自己親身體驗過先知有幾苦。雖然三子表面講嘢好直接，好似好無禮貌咁，但其實內裏都幾成熟，識得關心人。知道龔生係新仔唔熟悉行業運作，主動善意提點龔生，「大家係條街到就係手足」，大家平等無分你我，幫到就幫啦！
對住島大𡃁仔，龔生繼續自信爆棚，冷酷咁離開新威龍廣場。
外賣燁7日體驗之旅正·式·展·開。龔生嘅送外賣旅程就好似打機咁，過五關斬六將，
充滿挑戰!!!
【外賣燁有何苦？】
@實景上環區
〘第一關：地獄區搵路〙
大大個太陽照住，龔生流曬汗左搵右搵，拎住顧客寫到唔清唔楚嘅地址好·迷·惘，究竟係38樓定38F？問路又俾人睇唔起，嫌棄係外賣仔😞。唉，只能夠靠自己......原來係咁lonely......
38F? (我笑咗😂，龔生大嗌強調38F好容易諗錯隔離㗎喎😏)
幾經辛苦龔生靠自己成功搵到啦，立即變咗小朋友咁✊🏻✊🏻YES❗️❗️❗️，勁興奮快步跑上樓😆。
但原來行7層樓梯係咁鬼攰，唔怪得知叫地獄區啦 TnT。龔生行到濕曬喘氣，仲要俾大叔串渣嘢😥。
終於都去到顧客屋企，但原來個客並唔係喺屋企叫外賣，要龔生熱住咁等個客出現…… 龔生質問個客嘅時候，縱使內心好無奈，但並冇忘記要有專業嘅態度，嗯嗯，「顧客永遠是對的」，所以臉上仍保持燦爛嘅笑容😁。 客人嘅時間好寶貴，但外賣員嘅時間就唔寶貴，外賣員等個客好過要個客等，真係咁都得？不過個客淨係掛住自己嗰份外賣，簡單一句「唔該」都無之如，仲嫌龔生問三問四……
〘第二關：酷熱天氣跑步賽，送遲收負皮〙
系統有bugs，派咗比平時遠兩倍嘅單俾龔生，搞到要同時間競賽。熱辣辣嘅天氣下，龔生已經好努力咁跑啊跑，但都係趕唔上進度。
餐廳唔體諒 (反眼🙄)，仲串住喝龔生：「出去等，唔好企係門口，阻住我做生意」。
一字記之曰：「忍」，龔生只可以將度氣吞落肚。
當心情帶點煩燥嘅時候，收到顧客催call，被嚇如果再唔嗱嗱聲送嚟就要收一星負評，以後都無單接...... 雖然外面陽光普照，但龔生內心灰濛濛一片......
我諗依場戲，龔生正正體驗緊之前島大三子所講嘅：
1️⃣「不穩定因素」
2️⃣「客人得閒無聊，無啦啦投訴，令外賣員接少咗單」
〖外賣大叔龔?〗
出面街鬼咁熱，入商場冷氣又鬼咁凍，依度令我諗起自己成日入商場就嗌冷氣好凍，身同感受哈哈。睇live嘅時候覺得龔生依個「一熱一冷」位做得好smooth，之後睇Stanley IG post comment，原來好凍亦係佢當時嘅真實感受呢。
「點先可以舒服啲呢？」
正當龔生陷入迷思，眼前就出現人版。唔，摺上衫袖，拉高褲腳，風樓箍腰，頸擺汗巾，就係咁簡單。
龔生照板煮碗變外賣大叔look，八千公老闆娘見到依個造型差啲認唔到龔生😂😂😂。龔生平時着西裝姿整有型斯文，同依家嘅外賣look又的確有好大嘅反差哈哈。不過龔生唔介意係熟人面前不顧形象，證明佢真係放低咗白領總監高層嘅身份，認真作賽，投入外賣員嘅工作，👍🏻。
〘第三關：鎖咩車咩呀？〙
體驗過喪跑完收負皮嘅唔愉快經歷後，醒目龔當然立即改變策略，決定以單車代步。唔使俾人負評啦，龔生終於笑翻😊，接多張單先 (心曠神怡tone😄)～
得意洋洋之際，😳，搞咩呀，做咩鎖咗車㗎😰❓原來要做登記......唉擺係度一陣啫，乜咁麻煩㗎😑......
依個搞笑位加得幾好，令觀眾即刻 recall 沙田某城極速鎖車隊🤣。
〖體貼入微的未婚妻〗
@初戀cafe
「哎呀，陰公咯，搞成咁。」媽呢空眼見龔生成身濕曬，攰癩癩咁行入初戀cafe，心痛死啦😟。體貼水二話不說就拎紙巾幫fiancé抹乾汗水，關心龔會冷親，又叫定lunch等龔返嚟即刻有得食，的確好細心。
媽呢空唔忍心見到龔咁辛苦，嘗試勸龔返office做翻亞太區總監。好勝要face嘅龔生當然要保持魅力，點可以係未婚妻面前認輸㗎？
以前少年龔有咁多難關都捱得過，依家嘅外賣之苦同以前比較起上又真係濕濕碎嘅。不過唔同嘅係依家龔有細心體貼嘅媽呢空照顧，係背後做最強後盾，分擔憂苦，唔使自己一個獨撐咁sad！其實龔同水一樣都係唔會屈服、迎難而上嘅職場三文魚🐟，所以龔生意志非常堅定，職場上係冇龔解決唔到嘅事，點會咁容易放棄呢！
原本龔生諗住可以趁 lunch time 有少少時間，可以同心愛嘅媽呢空二人世界撐枱腳，點知媽呢空要陪大小姐做嘢😣。
(龔生心諗：唔係嘛，又係你呀大小姐，阻住我同媽呢空😒。)
龔:「吓，唔好啦。」
(嘴扁扁，微微嘟起，嗲一嗲)
龔係媽呢空面前永遠最真、最自在，完完全全咁顯露自己嘅心情。平時見得多水水扁嘴嘟嘴，依場戲撒嬌龔都好可愛喔😊！
(依度我諗起EP907餐廳戲，媽呢空好期待龔生準備嘅驚喜，但落空，失望水掃興扁嘴😝。)
雖然有媽呢空嘅「加油、加油」(如果媽呢空臨走前加多一個小動作 e.g.拍一拍龔生膊頭/做個打氣樣，就會更加甜😛～)，但龔生最想嘅係有媽呢空陪伴，sweet sweet 叉叉電……
〖打救外賣燁？〗
唔經唔覺已經做咗4日，但辛苦咗咁耐，搵埋單車代步，都只係賺得三千蚊雞碎咁多，距離目標八千仲差好遠好遠......原來做外賣員，錢，唔係咁容易賺......淨翻3日，點算好呢？
「洗乜驚，兄弟幫到你！」
正當龔生苦惱緊嘅時候，真·兄弟出場啦，打救迷茫嘅燁仔。雖然媽呢空走咗去陪大小姐😔，好彩仲有好兄弟。
向來鬼主意多多嘅🥜三友用 “Common Sense” 醒咗兩招外賣員賺錢秘技俾龔生，同時回應劇情開頭龔潮(顧客)嘅極差體驗，解釋翻點解用外賣app叫外賣會遇上依啲問題：
🅰️ 善用死板嘅系統漏洞
👉🏻「未送到，話送咗」！咁就可以一次過送兩張單以上 ～
👉🏻 驚自己送唔切？ 搵朋友幫手送啦～
(所以1️⃣ 點解啲外賣成日等勁耐餓到發癲都未送到嚟，2️⃣ 送餐嘅外賣員唔係app裏面嗰個人)
🅱️ 徵用高分Account
👉🏻 有好評嘅紀錄，就可以加快接單速度，單接單無難度👌🏻
雖然三友嘅賺錢秘技聽落可以幫到手賺多啲，但龔生第一個反應竟然係唔認同三友嘅手法，覺得出術賺錢唔係咁好......
(睇到依度，有點安慰，經過歲月嘅洗禮同俾媽呢空感化，龔生嘅處事手法真係改變咗好多😊。)
食飽收集完三友俾嘅行業情報，龔生就繼續上路拼搏。
〘第四關：冇單變超多單？〙
三友真係講得啱，作為新仔冇咩評分，之前仲俾人一星負評過，唔怪得等極都無乜單啦，唉......龔生嘅挫敗感不斷提升...... 眼見好多同行都「善用」系統漏洞，龔生內心焦急，開始動搖，「個個都咁做，我照跟都唔係好過分啫🤔」。
龔生決定跟風試一試，set好搵食架生，將單車變成外賣戰車。好兄弟真係好兄弟，講得出做得到，真係搵咗好多高分Account幫龔生賺多啲！
怎料......
一個小意外，龔生唔小心同一時間接曬6個Account嘅外賣單，又唔知點解cancel唔到🤯......
外賣燁送外賣遊戲🥡🎮 嘅難度急劇增加......
〖龔潮鬥嘴對決🔥〗
@潮生片場廠景
潮生等到翻白眼好搞笑😆
咁岩接到潮生張外賣單，龔生為免見到尷尬，戴翻個口罩遮遮掩掩，仲變埋聲，變聲真係好鬼好笑🤣。知道自己遲咗送嚟亦有少少漏汁嘅情況，龔生都唔好意思，不過潮生唔收貨之如仲大聲鬧「做死一世外·賣·仔」......
(唔知係咪因為潮生叫外賣成日遇到唔好嘅經歷，啲怨氣日積月累，加上餓咗好耐，忍唔住爆seed大鬧🙈)
龔生忍無可忍:「喂，鬧夠未呀依家！」
(「喂」個下又幾型😌）
面對潮生嘅指罵，龔生都唔客氣講個事實出嚟，為外賣員平反。龔生承認的確有外賣員濫用系統漏洞搶單賺多啲，但並非個個都係咁樣，有時可能只係有意外發生......
龔生：「唔該你哋呀，對外賣仔都俾翻少少尊嚴呀，唔好以為外賣仔就可以恰😠！」
(龔生一嘢除口罩表露自己，除口罩個下又再型多一次😌）
當然今次龔生係有唔岩，但若然外賣員真係有做得唔妥當嘅地方，顧客可以提出意見向公司反映，而唔係當面用極惡劣嘅態度踩外賣員。我諗依場戲應該想提醒大家，有時候有啲嘢唔可以只睇表面，外賣員背後嘅苦衷、辛酸你未必知，即使外賣業喺一般人眼中只係一個好卑微嘅行業，但都係正當職業要靠自己雙手努力搵錢。每個行業都有各自嘅價值，都應該受到尊重，所以唔應該覺得自己嘅職位高層次啲就可以隨便呼喝外賣員。
龔生發聲完之後，簡單講咗句 “Bye Bye” 就大步走閃人。龔生就算做緊外賣員，身份唔同咗，但對住潮生仍然不失霸氣！龔生心諗：你唔收貨呀嘛，咁我直接走人！(我覺得依個bye bye位好好笑，龔生個樣同語氣一副「我冇眼睇你，我走，潮生你吹我唔漲呀」，好正🤣)
龔生反擊，仲搞到潮生曹總冇得食，依場龔vs潮battle，應該龔贏潮1:0😆。
〘第五關：彈盡水絕〙
@潮生片場外景
跑單辛苦咗咁耐，加埋蠻烈嘅太陽，要抖抖補補水先。龔生內心：吓，飲晒一滴都冇😧，死啦就嚟中暑行唔郁，依個時候先嚟缺水😖......
眼前有杯凍檸茶，😇天使龔與😈魔鬼龔小掙扎，突然諗起潮生之前講過嘅都市傳說「外賣仔偷飲檸茶」，唔掂太口渴，😈魔鬼龔忍唔住拎起杯檸茶......
(龔生依場內心掙扎戲確係做得幾好，欣賞演員Stanley善用眉頭、眼、嘴、喘氣去表達內心情緒，面部微表情到位，能夠帶動到觀眾入戲，我睇嘅時候真係feel到個種無水飲、好熱、好口渴、好無力嘅痛苦感。)
正當龔生係犯錯邊緣，島大𡃁仔就出現出手拯救龔。龔生突然見到島大𡃁仔，“sam hui” 咗一下。
安仔見到龔生個樣好唔妥，即刻遞樽水俾龔解渴。頭皮書蟲見龔生跌watt有啲攰，主動幫龔生送外賣。
頭皮：「雖然我地唔係好妥你，但係得條街到搵食，大家就係手足，互相幫忙好正常㗎啫。」
龔生再次感受到人間有情，輕輕咁嘆咗一口氣，凝望天空，若有所思。其實班後生仔唔係淨係聲大大，佢哋有毅力、落力賺錢之如，仲會主動關心同路人，講義氣真心待人，原來佢哋都唔係想像中咁「無知」。有同伴嘅協助關心，其實都唔係咁lonely嘅......
【橋王龔的改善方案是......】
@接龍
完成咗外賣燁7日體驗之旅，體驗完外賣員嘅辛酸之後，龔生終於知道影響服務質素嘅真正原因啦！
龔生嘅方案主要包括3點：
1️⃣ 提升外賣員嘅薪酬同福利
(👆🏻回應翻島大三子提出嘅「工資計算唔公平」)
2️⃣ 修正系統漏洞
(👆🏻回應翻接龍三友提出「未送到，話送咗」嘅問題，避免外賣員濫用，影響送餐速度)
3️⃣ 維護外賣員嘅尊嚴
老細聽到要提高成本去改善員工質素，第一反應當然唔太認同啦(同龔生未體驗之前嘅諗法一樣) 。
龔生接着解釋提升薪酬嘅原因，用自己嘅親身經歷做例子，先講出外賣員經常遇到嘅難處，然後帶出點樣影響服務質素：
∵
👉🏻 外賣員經常要上上落落、身水身汗，需要體力勞動嘅工作一啲都唔容易
👉🏻 客人可以隨時用評分機制懲罰外賣員，外賣員只能夠吞忍，咩到做唔到
∴
👉🏻 外賣員好容易失去動力
👉🏻 有啲外賣員因為想搵多啲錢而走精面
外賣員係多勞多得嘅工種，薪酬正正就係佢哋最大嘅動力來源。有合理嘅待遇，員工開心，心甘情願落力工作，減少外賣員走精面賺錢嘅情況。
龔生：「坐office嘅從來都冇理解過前線嘅感受。作為老闆，好應該俾員工得到一份令佢地覺得合理，同時又係我地成本規劃以內嘅報酬，等班員工心甘情願幫我地賺錢，咁樣先係win-win雙贏嘅諗法。」
無可置疑有時高層做決策嘅時候只會注重成本效益同結果，唔會認真考慮下屬執行時嘅難處，容易怱略下面一班打工仔嘅真實感受。提高營運成本只係短暫，作為一個大集團應該有足夠資金支撐嘅。好員工係公司重要嘅資產，而人性化嘅政策、合理嘅薪酬回報就係留住好員工嘅方法。目光放遠啲，公司鼓勵式滿足員工需要👉🏻員工俾心機正正經經做嘢👉🏻顧客滿意👉🏻聲譽提升👉🏻有更多顧客願意幫襯👉🏻長遠公司利潤增加，外賣員多咗單接收入多咗，良性循環，我諗依個就係龔生所講嘅「win-win雙贏」吧！
雷公果然係個開通嘅老細，聽完龔生嘅解釋唔單止接納龔嘅建議，仲道出「呀，我好耐都冇聽過啲員工同我講真話。自己啲員工都管理唔好，點學人做老闆呀？」龔生聽到雷公咁講，得到老細嘅認同肯定，會心微笑。
(題外話：當日睇live睇完依幕之後，腦海立即浮現「憑心講真話嘅重要性」。雖然完完全全唔關事，但龔生講完「win-win雙贏」，我就諗起我上一篇感受長文講過一段說話：
“問題出現了，觀眾反映了，機會給予了；團隊就齊心諗諗計搵方法去解決，等觀眾對劇組 (esp. 編劇們) 重拾翻信心；依個先係觀眾，尤其係忠實粉絲，希望能夠見到嘅成果。觀眾睇得開心，滿滿嘅讚賞，劇組又開心，成為動力，珍惜觀眾，製作更多好作品，觀眾賞析真心支持，win-win 良性循環。”
但願劇組聆聽網民係唔同平台發表嘅意見，繼續💪🏻製作更多好作品速遞開心俾觀眾，win-win 良性循環得以持續落去 #仍盼望💫）
【龔生對外賣員的觀感態度有何改變？】
@龔生 Marketing Office
了解過外賣員嘅工作之後，龔生嘅改善方案2.0全面完善，包括各方嘅意見同需要，strike a balance，對症下藥，針對性解決問題。龔生並冇為咗迎合老細而採用強硬嘅規矩，仲幫外賣員爭取到應有嘅福利添，現階段嘅仁慈龔的確係好仔嚟👍🏻！
龔生當然冇令雷公跌眼鏡，地雷外賣app唔再係踩地雷，顧客嘅評分、評價 + + +，龔生再次完美示範何謂接龍職場拆彈專家，「考牌」大成功！！！
龔生立大功，媽呢空緊係大讚啦😻，我嘅fiancé真係好叻仔㗎啫😽！但龔生竟然有功都無自己攞曬彩，反而感恩有一班外賣員落力工作令顧客滿意，今次嘅成功並唔係自己嘅功勞，而係外·賣·員！
係外·賣·員，唔係外賣仔呀！！
龔生承認自己當初嘅諗法係錯，對外賣員嘅睇法態度亦唔好。接觸過之後，龔生確確實實知道外賣員要每日係條街到走來走去，體力勞動大，所賺嘅都係辛苦錢，滿有汗水，並唔係想像中咁容易。雖然龔生以前曾經遇過服務態度唔好嘅外賣員，但都唔應該以偏概全認定所有外賣員都係咁差，其實有好多個都好努力，只係之前冇留意/未遇上。
媽呢空內心：我嘅fiancé唔單只叻仔，仲有一顆和善嘅心，今日嘅龔生真係特別charm😚。
地雷外賣app成功洗底，當然要幫襯支持一吓啦。龔生再次遇上相熟嘅外賣員，做咗四個舉動：
1️⃣ 先黎臉上誠懇嘅笑容 + 一聲簡單嘅道謝：「辛苦哂，山長水遠」
2️⃣ 然後見到外賣員大汗疊細汗，主動遞上紙巾
3️⃣ 關心外賣員需唔需要飲水
4️⃣ 再次說聲：「多謝」
龔生如此主動，確係感動。感覺上，依個位同前面媽呢空拎紙巾幫龔抹汗&安仔遞水俾龔解渴兩場戲係有linkage。龔生做外賣員嘅時候曾經得到身邊人嘅主動關懷，受到媽呢空、安仔島大三子嘅影響，今次龔生識得用真誠嘅行動表示關心，等曾經嘅同路人同樣能夠感受到人間·仍有愛，外賣員並唔係孤獨嘅一群！
我鍾意一前一後嘅對比，兩場@龔生office同媽呢空對談嘅戲，帶出龔生對外賣員睇法上嘅改變，由「主要都係外賣員嘅錯」到「主要都係外賣員嘅努力」；之後龔生係office叫外賣就同開場熊家叫外賣戲做比較，呈現龔生對外賣員嘅態度180度改變咗，由「冷冷淡淡」到「熱切關心」。
而開頭結尾用同一位外賣員，佢就係龔生所講「努力」嘅代表 - 30分鐘就送到、包裝妥當冇漏汁👍🏻。
好嘅員工遇上好嘅客人，大家笑容滿面，好和諧嘅畫面。
外賣員：「先生你咁好，我一定要俾翻個正評你先得！」
龔生：「我都俾個正評你！」
媽呢空好奇問龔生：「乜有互評㗎咩」？
原來依個係龔生新加嘅功能！之前睇龔生present proposal 嘅時候，對於第3️⃣點 - 維護外賣員嘅尊嚴，我諗咗陣，即係點呢？原來雙向評分制度就係實質嘅方法。編劇將條橋保留唔講住，最後透過龔水嘅互動回應翻，依個編排又幾好。
龔生考慮周到，無論係顧客定外賣員都應該得到適當嘅保障，咁樣先至公平㗎嘛！所以......
【輪到潮生做外賣偉？】
@潮生片場廠景
曹總又餓啦，搵潮生幫手叫外賣。怎料......
曹總：「(潮偉)你俾啲外賣員負評呀？既然大家都唔得閒，你都可以做外賣仔咯！」
我笑點低，覺得個結尾好好笑🤣。今集潮生做咗West客代表😅，雙向評分制度嘅功用就由潮生示範俾大家睇。曹總最尾個句又幾屈機吓 🕺🏻 ～ 曹總係米飯班主，潮生你無得揀㗎啦😂，話唔定你同龔生一樣做完有另一番體驗，對外賣員改觀呢😉！
龔生暗地裏發力，依場龔vs潮遠距離暗戰，應該又係龔贏潮吧❓❗️，累計2:0，
完場🎉。
其實今次龔生職場上嘅考驗能夠過關，島大三子功不可沒呢！若果冇佢地當日嘅直接挑機，我諗龔生都未必會走去做前線了解外賣員嘅工作、未必會從外賣員嘅角度諗多啲、未必會用win-win雙贏嘅完善方案sell俾老細。雖然最後同島大𡃁仔打賭嘅遊戲，我諗龔生係無贏到，但有乜所謂呀，龔生今次贏到嘅，除咗有老闆「橋王之王」嘅好印象之外，仲有人生難得嘅體驗同埋難忘嘅回憶💭。
【不一樣的龔生】
睇完今集，除咗好開心見翻失蹤咗好耐嘅職場龔成功幫公司拆彈之外，我仲有另一種感覺 -「龔生真係唔同咗！」。我係度諗，如果係早期嗰個賤精先生，死賤精會用咩方法去完成依個外賣app洗底任務呢？
有人可能會話劇情上以前嗰個走精面、識做門面功夫嘅古惑龔好似吸引過依家嘅溫和龔好多，今集🥜三友仲有”sense”過龔生，識得用聰明嘅方法賺錢。
但我會話見到龔生轉變，仲吸引我。龔生依然係有自信、識靈活變通嘅醒目仔，但現階段脫胎換骨、人品好嘅龔，更上一層樓。
點解龔會有轉變？
「人生匆匆幾十年，當中有相聚、有離別，係你身邊出現過嘅，可能係多不勝數嘅人，但最後邊個會留係你身邊？」(by 森仔)
三個字：「媽呢空。」
幸運地龔有雙下巴天使係身邊，生命先至得以轉捩。
(上一篇文寫過話媽呢空係龔嘅心靈導師，多次開導龔幫佢解心結走出陰霾。今次嘗試用媽呢空嘅做人宗旨、正面價值觀，講吓點樣影響到龔生嘅處事方法)
翻翻去2年前龔生離水前(參考EP280「燁來越愛你(下)」)，龔生俾Jenny跣，搞到市場部抽獎活動計劃出咗問題要諗計拆彈。當時龔生第一刻諗到嘅解決方法就係「卸膊」，搵人食死貓係最簡單嘅方法。龔生唔忍心卸俾心上人媽呢空，於是諗住搵自己下屬咩咩祭旗，咁龔水就可以甩難一身輕。
💧💬🏹：「出賣朋友依啲咁賤格嘅嘢我係唔會做嘅。」
🏹💬💧：「友情值幾多錢呀？重要得你份工？」
💧💬🏹：「錢係緊要，但人格仲緊要呀！細伯頭先都有講啦，做人最緊要有擔帶呀！」
(👆🏻媽呢空依句對白真係好hit到我)
依個世界上，係冇龔燁卸唔到嘅膊。由龔生家道中落踏上賤精之路開始，「人格」兩個字係龔生嘅字典裏面徹徹底底消失了。
幸好有媽呢空係身邊點醒龔，令龔第一次覺得阿爸講嘅嘢係岩嘅，反省自己。最後龔揀翻條岩嘅路行，負翻部門阿頭應負嘅責任，用高招但唔損人利己嘅方法成功拆點場關公災難。
之後龔去咗新加坡發展，同媽呢空分隔兩地接近5個月，但龔並冇忘記媽呢空曾經同佢講過嘅說話。
龔生回水之日，就同媽呢空講：
🏹💬💧：「正當我想害佢嘅時候呢，我突然間諗起一個女仔同我講過一句說話，『人格比起金錢重要』，出賣朋友依啲咁賤格嘅嘢呢，係唔應該做嘅！」(EP376「水的燁𡟇(上)」）
雖然當日龔生只係求其作個故仔呃下媽呢空，但起碼佢有將媽呢空嘅話牢牢記係心入面。
正義的熊若水本色🌟
深深植在龔燁心中💘
一步步感化龔改變👼🏻
媽呢空嘅外表當然吸引啦，樣唔差、身材高䠷、黃金比例、老幼咸宜，一個字：「好正」。但龔更喜歡嘅，係媽呢空內裏善良無比嘅心 (由EP261「唔係我呀！」開始)。
為咗心愛嘅媽呢空，龔肯面對過去、改變自己，亦一直乖乖咁遵從阿爸嘅教誨「對女朋友要體貼、呵護」，訓練好個膊頭承擔咗好多好多嘢，漸漸就脫離咗賤精之路。
由昔日只會對龔爸好，到追水拍拖訂婚後對媽呢空、熊家人、兄弟下屬好，再到今日對街外人(外賣員) 好，龔生真係大個仔啦！「人格」兩個字確確實實重現翻係龔生嘅字典裏面。
龔爸：「後生仔出黎社會做嘢最緊要抵諗啲呀。仲有要識多啲朋友，你幫我我幫你，咁至得㗎！」(EP280「燁來越愛你(下)」）
今次嘅外賣燁體驗之旅，龔生勇敢幫外賣員發聲平反、向老細堅持幫外賣員爭取福利、事後學會感恩主動關心外賣員，一連串嘅舉動證明「人格比金錢重要」；龔生，你真真正正做到啦🎊！
(去到EP968「認錯仁」，當大家係初戀cafe討論仁哥vs卓羲，龔生好兄弟Peter提議仁哥搵HR幫手唔好好請卓羲時，龔生竟然插嘴反駁兄弟：「哇你啲咩橋嚟㗎，為咗自己面子斷人米路，唔係掛？」依個短短嘅過場，再次證明龔生對事對人嘅睇法真係正面咗好多，賤精影子不見了。)
早幾日同龔水粉絲傾開講到龔水戀之所以好睇，除咗龔水日常有甜有苦之外，最難得嘅係見到龔同水經過一段長時間嘅相處，脾性、待人之處都受到對方影響而有轉變，角色一步一步成長，變得更好。
而觀眾就陪伴着龔水走過每一步，親眼睇住龔水逐步改變、成長。
(話說，龔燁兩年幾由賤格到溫馴，角色人格嘅轉變的確寫得幾好，過渡好自然，我完全搵唔到丁點洗白感。）
我覺得：
早期嘅龔生擅長用聰明嘅方法拆彈，
今日嘅龔生識運用智慧去解決問題。
你可能會問，聰明同智慧有咩唔同？
智慧係另一種境界。
早期嘅龔生係唔會做一啲對自己無實際利益嘅嘢，為咗達到自己嘅目的，經常用旁門左道、損人利己嘅手段做事。「結果」比「過程」更重要，要犧牲身邊嘅人又有咩所謂呀？只要最後無事、拆到彈、領到功、上到位，就得啦！賤精之所謂賤，係因為只諗自己，處事時完全唔會考慮其他人感受，踩住人上，連下屬都可以出賣......
結果成功拆彈，但暗地裏害完人內心會好過嗎？
反之，
今日嘅龔生做事唔再只為自身利益，寬容接納唔同意見，會企係其他人嘅角度去諗為佢地設想，利己利人。「過程」同「結果」同樣重要，將眼光放遠啲，唔會只注重短期利益。建立信譽、保持良好關係、提升形象，換嚟嘅係長遠持續嘅效益。做人厚道，做事踏實，尊重他人；久而久之，人緣亦會隨之而來。
💧：「做人對得住自己，咁樣做人先會開心㗎！」(EP280「燁來越愛你(下)」）
今集龔生同樣成功拆彈。但唔同嘅係佢善待他人，自帶光芒，相由心生；龔生臉上嘅笑容特別自然、特別美。
所以今集龔生嘅魅力，係來自「有才亦有德」。
無意中係網上搵到孔子嘅說話，我覺得幾適合：
「子欲為事，先為人聖」「德才兼備，以德為首」「德若水之源，才若水之波」
(不過唔好意思，由於我嘅文言文翻譯能力極差😂，亦搵唔到我覺得可靠嘅網站fact check孔子想表達嘅意思，所以就留翻俾大家自行解讀啦😉～)
係喇，有智慧嘅職場龔真心好正喔😸，希望之後可以欣賞到更多真真正正嘅接龍職場戲😀 (唔係初戀cafe講八卦嘢嗰啲呀😹)。無論係市場部龔主力又好，尋寶圖水主力又好，定各部門cross over通力合作群戲又好，照殺，不過最想睇嘅都係龔水聯手KO職場任務🤩。
#⛲⛲⛲⛲⛲
【喜歡這集的原因是......】
〖劇情節奏明快流暢〗
劇情上，今集立意明確，故事發展點題有鋪排，情節與情節之間緊密聯繫，細節位互相呼應突顯主題；亦睇到編劇有做功課，按以前集數所訂嘅角色設定，合理地加入連戲位。
〖劇情豐富，故事題材源於生活〗
因疫情影響，近幾個月的確多咗市民用app叫外賣。所以外賣app依個話題係非常貼近現實，取材恰當。由於真實，觀眾睇嘅時候代入感強，好容易就聯想起自己平時叫外賣時嘅狀況。雖然我自己就無用過外賣app叫外賣、亦無做過外賣員，對於劇情內容其實無咩共鳴感，但今集正正加深咗我對外賣業嘅認識。
我特別欣賞劇組將整過程呈現出嚟：
1️⃣ 一開始主角以顧客身份評論外賣員
2️⃣ 主角被委以重任幫公司重整外賣app大洗底
3️⃣ 主角從公司顧客角度了解負評原因
4️⃣ 主角跟現職外賣員對話了解實況
5️⃣ 主角親身做外賣員，從主角嘅體驗之旅帶出：
👉🏻 外賣員嘅工作
👉🏻 外賣員平常遇到嘅難處
👉🏻 路人/顧客/餐廳對外賣員嘅態度觀感
👉🏻 外賣員想賺快錢嘅潛規則
👉🏻 外賣員嘅辛酸與心聲
6️⃣ 公司做決策時嘅考量，主角如何説服老細採用win-win雙贏方案
7️⃣ 主角成功完成職場任務，體驗過後對外賣員嘅睇法、態度有所改變
8️⃣ 以主角新增嘅功能 - 雙向評分制度作結尾
故事骨幹完整，以唔同角度探討外賣app話題，囊括各方(顧客、公司、外賣員、餐廳路人) 睇法同意見，引發觀眾多方面思考、討論。
〖故事訊息正面有影響力〗
認同其他網民提到今集內容多咗一份人情味，我感覺編劇係有加入「愛」嘅元素。除咗有龔水嘅愛情、接龍風流四子嘅兄弟情、老闆雷公嘅通情達理之外，仲有島大𡃁仔唔計較幫龔生嘅仗義之情同龔生對外賣員嘅關懷之情。
「互助互愛」依個 term 好似有啲老土，但現今社會好多人勞碌打拼、追求物質財富、專注過自己生活嘅時候，卻忘記留意身邊嘅人和事。你同我毫不相識，你嘅事同我毫不相干，點解要關心呢？我諗我自己有時都會咁樣😅！今集頭皮講到：「互相幫忙好正常㗎啫」，就提醒咗我，係喎，唔好只顧自己，平時觀察多啲社區街上發生嘅事，眼見路人真係有需要幫忙時，嘗試主動上前了解。大家住係同一家園，真係有必要「你還你，我還我」計較咁多呢？有時只係簡單嘅慰問或者一聲「加油！」，都已經俾到對方一種支持 — 精神上嘅支持。
「尊重」，亦係我睇到嘅另一個訊息。就如我上文所講，每個行業、每一個正當職位都有各自嘅價值，有各自存在嘅意義。老土啲咁講：「職業無分貴賤」，無論係白領高薪一族，定係低下勞動階層，咩工種都好，只要大家都係努力工作，每一位嘅付出都值得受到尊重、重視。今集龔生由高層變外賣員，佢嘅辛苦體驗之旅就話俾大家知唔好輕視需要體力勞動嘅工作(外賣員)，亦唔好帶有偏見假定勞動者(外賣員)就一定係無學識、低層次、唔正經，可以隨便任恰任喝唔嬲。每個行為、每句說話都代表緊自己嘅品格，尊重他人其實亦都係尊重自己。編劇描寫咗幾個路人/顧客對外賣員冷眼相待，正好讓觀眾自行代入，反思/反省自己平時對外賣員嘅態度係咪都係咁樣呢？
〖演員演出認真〗
今集主要演員Stanley演繹時表情豐富細緻，龔生踏上外賣燁體驗之旅嘅時候，就好似帶埋觀眾入戲，一齊參與旅程，一齊感受做外賣員有幾苦。我覺得主角龔生係唔同情景講對白時嘅語調+轉換；演內心戲時(e.g.糾結位) 嘅眼神、微表情、情緒變化；肢體動作/設計嘅小動作等等都拿捏得好。我唔識表達，唔知點樣形容，總之簡單四隻字：「睇得舒服」😌。講真，真係好耐好耐冇睇過一集有咁多龔生solo位，所以今集真係睇得好過癮😇，係久違嘅感覺呀🙌🏻!!! (當然今集其他配角&路人嘅演出都配合得幾好唔錯唔錯～)
〖總括來說〗
今集外賣燁嘅故事搞笑位✅、發聲位✅、平反位✅、思考位✅，我覺得每分每秒都咁好睇！
「故事生動有趣，輕鬆幽默，對白搞笑，背後還帶出訊息令觀眾反思討論。」
編、導、演嘅用心，以及其他幕後人員嘅努力配合，觀眾係睇到亦都感受到，讚喔👍🏻。
4月第一篇感受文我講過自己偏向鍾意睇平實、同日常生活息息相關嘅題材，所以貼地嘅EP960 外賣「燁」之苦，的確好岩我口味，正正就係我想睇嘅處境劇式效果！
不過從數字上嚟睇，普羅大眾似乎都係鍾意睇啲大起大落、充滿戲劇性，或者有 Gimmick 嘅劇情......但我自己就覺得現時/前排有啲劇情偏離咗處境劇嘅模式，探討現實人性、引人共鳴嘅題材亦好似比較少。可能我個人太過拘泥，對於處境劇跳出既有嘅框架、合家歡時段嘅劇情正劇化，無太大好感；又或者係我依個普通觀眾孤陋寡聞唔識睇，理解唔到編劇組嘅諗法用意......
唔 知 大 家 又 鍾 意 睇 啲 咩 呢 ？
若然你有由頭到尾睇完依篇 EP960長篇感受文，我衷心多謝你，非常多謝你嘅耐性。若果你想轉發，我唔介意(註明出處🙆🏻♀️)，亦歡迎你去我 ig post (@_share._thoughts_) 留言分享你嘅睇法、你嘅感受，謝謝大家!
(BTW, 龔水主線。。。我。。。彷彿等到無感覺，渴到就嚟冇反應😅。不過有的還是耐性😌，等到花兒都謝了🥀，仍會繼續默默等😼，鬼叫自己咁鍾意龔水cp龔水線咩😽！幸好，嚟梗嗰個星期有兩集龔同水戀愛線以外嘅故事，應該有龔水副線，希望正正常常有驚喜啦～)
【後記】
終·於·寫·好·啦😆!!
起筆前，我係度諗應該點寫好呢？概括式？定詳細式？最後揀咗後者，由頭到尾每一幕都寫一寫 (再加插個人睇法&感受)，因為我想帶出依集劇情連繫性有幾強，情節與情節之間環環相扣，我覺得全集係冇多餘嘅廢話。所以大家睇完我依篇感受文就等於重新睇多一次EP960咁，不過係圖片文字版，希望冇悶親大家啦🤣！
寫完之後，我發覺自己睇野仍係比較淺層，唔係好識點樣分析得深入啲；又或者係寫唔出個種感覺/表達唔到，一路寫有少少棘住棘住咁哈哈😆。大家要睇文字有感染力或賞析度高嘅龔水文章嘅話，都係去搵翻文筆掂嘅龔水fans吧😉！我諗若然有任何較為專業嘅劇集分析人士咁岩路過，睇到依位「唔識寫😅又要寫🤪」嘅觀眾所寫嘅3篇感受文，一笑置之吧！無計，皆因我只係一個普通到無得再普通嘅人💁🏻♀️，係咁上下㗎啦😌～ 我純粹戚起條根想用文字記錄個人感受💭。
若果你問我鍾意✍🏻寫字定🖌畫畫多啲❓ 都係🎨 畫畫好玩啲😝❗
好啦，再次講聲「多謝🙇🏻♀️」，多謝大家支持同願意花時間睇完整篇文章！
